Një marrëveshje historike në botën e animacionit: Disney do të bëjë një investim kapital prej 1 miliard dollarësh në OpenAI. Gjigandi i argëtimit do të bëhet partneri i parë i madh i licencimit të përmbajtjes për Sora, platformën video të inteligjencës artificiale të Sam Altman. Aksionet e Walt Disney u rritën me 2.3% në Wall Street menjëherë pas njoftimit të marrëveshjes.
Në mënyrë specifike, sipas marrëveshjes, Walt Disney do të krijojë mbi 200 personazhe të animuar, kostume dhe krijesa jo vetëm nga universi Disney, por edhe nga ato të Marvel, Pixar dhe Star Wars. Kompania Walt Disney ia jep licencën e përmbajtjes OpenAI për tre vjet. Sora do të jetë në gjendje të gjenerojë video të shkurtra sociale të krijuara nga përdoruesit, të cilat mund të shihen dhe ndahen nga fansat. Përveç kësaj, fansat mund t’i kërkojnë ChatGPT Images të krijojë imazhe që mbështeten në të njëjtën pronë intelektuale. Marrëveshja nuk përfshin përdorimin e imazheve ose zërave të talenteve.
Deri më tani, studiot e Hollivudit kanë hezituar të hyjnë në marrëveshje të drejtpërdrejta me kompanitë e IA-së, të shqetësuara për përdorimin e të dhënave dhe tensionet e mundshme me sindikatat e industrisë, të cilat janë përballur me një sezon grevash në të cilat IA ishte një çështje kyçe. Pavarësisht kësaj, OpeAI ka filluar diskutime me aktorë të ndryshëm të Hollivudit, si Disney, Universal Pictures (Comcast) dhe Warner Bros. Discovery, për të eksploruar potencialin krijues dhe komercial të Sora-s.
