Po e nisim shkrimin me një pohim shumë të sinqertë! Na vjen shumë turp që jemi pjesë e gazetarisë kur shohim emisione të tilla si kjo e News24, “Me zemër të hapur”!
Në një kohë që e gjithë Shqipëria u trondit nga historia e përdhunimit për 3 vite rresht të 15-vjeçares në Babrru, sikur të mos mjaftonin intervistat me të afërm të vajzës së abuzuar, “Me zemër të hapur” shkon dhe publikon videon e minorenes duke u abuzuar seksualisht!
Po, edhe këtë e bëri dhe arsyeja dihet: Babëzia për klikime dhe shikueshmëri shkoi deri aty sa të nëpërkëmbin jetën e një vajze që tani më shumë se kurrë ka nevojë për mbështetje dhe drejtësi, por jo ekspozim.
Nuk e dimë se çfarë dreqin po bën AMA, por i bëjmë thirrje urgjente të reagojë për t’i hequr përgjithnjë vizën një emisioni të tillë që nuk ka asnjë vlerë televizive dhe as edukative.
Është e turpshme të kërkosh të bësh famë me jetën e një viktime të dhunës seksuale, duke i publikuar asaj videon e makthit. Një video përdhunimi e transmetuar në sy të babait të vajzës dhe gjithë Shqipërisë me pamje të sfumuara por që dallohen qartë dhe të therin në shpirt kur i sheh, është absurde, aq më tepër që emisioni transmetohet në mesditë, ora 12:00.
Por kjo nuk është hera e parë që “Me zemër të hapur” bën gafa të tilla, pasi edhe në 2017-n, transmetoi videon e një gruaje të re e cila ishte kapur në shtat me të dashurin e saj, ndërkohë që me titra shkruante “kryen veprime të turpshme në sy të fëmijëve”. Emisioni shkoi deri aty saqë identifikoi gjyshin e dy të fëmijëve 5 dhe 9 vjeç, duke e ftuar në studio dhe duke publikuar fytyrat e mbuluara të dy miturve.
https://www.instagram.com/p/CA5s3fWgSeQ/
Asokohe emisioni u gjobit me shumën 200 mijë lekë të rinj nga AMA, por me sa duket stafi i emisionit nuk po vë mend!
Mjafton të klikosh në YouTube titullin e tij dhe aty do të dalin lloj lloj skandalesh dhe absurditetesh që jo vetëm që nuk kanë përse të transmetohen, por që pretendohen të zgjidhen me analistët e emisionit. NUK quhet GAZETARI kur tenton shikueshmëri me tituj që mjafton të përmendin fjalët “Skandal”, “Virgjëri”, “Dashnor” dhe misioni u krye !
Etika e gazetarisë ka marrë fund dhe autoritetet duhet të reagojnë sa më parë për ta mbyllur këtë palaçollëk që as nuk informon e as argëton, por vetëm prodhon meme në rrjetet sociale dhe turpëron gazetarinë shqiptare!!
