Ditën e djeshme 27-vjeçari, Indrit Pepa u ekzekutua me breshëri plumbash në Mamurras
Ndërkohë sot, “Report Tv” mëson se autori i vrasjes është Agron Markola, shok fëmijërie i Pepës, me të cilin kishte hyrë në konflikt 6 vite më parë.
Në atë kohë, viktima Indrit Pepa dhe Agron Markola kishin debatuar me njëri-tjetrin, ku Pepa i ka thënë Markolës: “Ne jemi rritur bashkë, kemi veshur rrobat e njëri-tjetrin. Unë kam në shtëpi fotot e tua”.
Por 3 ditë më pas, Agron Markola dhe Azis Markola kanë dalë dhe kanë rrahur Indrit Pepën me qytën e pistoletës, duke e lënë të riun në gjendje kome.
Pas një viti, Indrit Pepa ishte në një berberhane në qytetin e Mamurrasit, kur në të u fut Azis Markola, një nga autorët e rrahjes. Indriti në atë kohë ka qenë 20 vjeç. Burimet bëjnë me dije se Pepa ka dalë nga berberhana dhe ka marrë një armë zjarri tip pushkë.
Në momentin kur Pepa hyn për të sulmuar Markolën, disa qytetarë e kanë kapur nga dora dhe e kanë mbajtur, por një plumb është shkrepur nga arma duke e plagosur Azis Markolën në të dyja këmbët.
Që nga ajo ditë, familja e Indrit Pepës është ngujuar brenda 4 mureve nga frika e hakmarrjes. Disa herë familja ka tentuar të shuajë konfliktin me Azis Markolën, por nuk ia ka arritur, raporton “Report Tv”.
Deportimi nga Gjermania dhe vrasja në Shqipëri
3 vite më parë, viktima Indrit Pepa ka emigruar në Gjermani ku ka kërkuar edhe azil pasi në Shqipëri kishte deklaruar se ndihej i rrezikuar. Në Gjermani, ai është bërë baba i një vajze, e cila sot është 3 vjeçe.
Pas 1 vit e gjysmë qëndrimi në Gjermani, Indrit Pepa është deportuar në Shqipëri, pasi sipas shtetit gjerman, Shqipëria është një vend i sigurt, dhe Pepës nuk i rrezikohet jeta.
Por e kundërta ndodhi. Një natë më parë, viktima Indrit Pepa ka qenë duke pirë në një lokal me disa miq të tij. Rreth orës 04:00 të mëngjesit ata kanë dalë nga lokali dhe Pepa ka përcjellë miqtë e tij nëpër banesat e tyre. Është kthyer në shtëpi pasi do i linte makinën vjehrrit, i cili duhet të nisej për në Shkodër.
Kur ka zbritur nga makina, 27-vjeçari Indrit Pepa ka pikasur 2 persona dhe është larguar menjëherë, por sipas familjarëve, autorët i janë vënë pas dhe e kanë qëlluar disa herë.
Burime për Report Tv bëjnë me dije se banorët e lagjes i kanë parë autorët e vrasjes por kanë frikë të flasin.
