Adnan Januzaj u shpall lojtari i ndeshjes Belgjikë-Angli mbrëmjen e djeshme pasi shënoi gol ndaj Anglisë, të vetmin gol të ndeshjes.
Dikur lojtar i Manchester United në Angli, Januzaj vërtetoi se shumë njerëz e kanë vënë në dyshim talentin e tij më kot dhe pikërisht ndaj këtyre zërave ka dashur të reagojë menjëherë pas ndeshjes futbollisti.
“Natyrisht puna ime ishte ta tregoja veten para njerëzve se në të kaluarën në Angli kisha shumë kritika. Dua t’i tregoj atyre njerëzve se jam këtu, jam shumë i kënaqur me këtë. Jam shumë i lumtur që shënova një gol të shkëlqyer kundër një kundërshtari të mirë. Unë kam shpenzuar shumë energji në punë. Këtë vit kam luajtur në një ekip si Real Sociedadi që më ka bërë të rritem si lojtar. Në moshën 23-vjeçare gjëja më e rëndësishme është të kesh paraqitje në fushë dhe të vazhdosh të përparosh. Jam shumë i kënaqur që po shkon në këtë mënyrë”, tha Januzaj për mediat britanike.
Pas golit ka pasur një sërë reagimesh në lidhje me talentin e Januzajt dhe rikthimin e tij në Manchester United:
“Përse e shitëm Januzajn? Ka ndonjë shans për ta rikthyer sërish?”
