Një 30-vjeçar nga Elbasani është vënë në pranga nga policia pasi 4 ditë më parë, i vuri qëllimisht zjarrin shtëpisë së vjehrrit të tij. Burime pranë familjes kanë bërë të ditur se gjithçka ka ndodhur pas lindjes së djalit të 30-vjeçarit Ç. Kasa nga fshati Reçan, i cili është gjithashtu baba i një vajze 4-vjeçare.
Sipas bashkëfshatarëve vëllai i Kasës nuk mundte të bënte një fëmijë, ndaj dhe 30-vjeçari i kishte premtuar se fëmijën e tij të dytë, do t’ja dhuronte atij. Këtë gjë ai e bëri që në maternitet, duke hequr dorë nga atësia e fëmijës për hir të vëllait.
Por një gjë e tillë duket se ka krijuar pakënaqësi tek familja e bashkëshortes së Kasës. Ditën e ngjarjes, mësohet se 30-vjeçari kishte shkuar në shtëpinë e vjehrrit për të pirë kafe, kur ky i fundit i kishte shprehur pakënaqësinë për dhurimin e nipit, gjë që është bërë dhe pa miratimin e tij.
“Mos ia jepje djalin vëllait, por bëje një fëmijë të tretë, pasi djali ishte trashëgimtari i shtëpisë tënde.”-mësohet t’i ketë thënë vjehrri Kasës, i cili ka këmbëngulur se nuk ishte penduar aspak për veprimin e kryer.
“Bëj fëmijë tjetër, nuk kam bërë mëkat që mbusha shtëpinë e vëllait tim.”-i ka thënë 30-vjeçari vjehrrit.
Debati më tej është acaruar dhe vjehrri i Kasës, e ka akuzuar atë se e kishte marrë këtë vendim pa pyetur të bijën. Mësohet gjithashtu se ardhja në jetë e nipit kishte qenë një gëzim i madh për vjehrrit e 30-vjeçarit, të cilët nuk kanë vetë një djalë. Kjo ka ndikuar edhe më shumë në pakënaqësinë e tyre kur është zbuluar se fëmija nuk do të rritej nga e bija e tyre dhe dhëndri. Më tej, pas debatit të tensionuar, 30-vjeçari ka marrë një shishe benzinë dhe i ka vënë flakn oborrit.
