Fakti që Interneti i ka orientuar qytetarët nga komunikimi nëpërmjet rrjeteve sociale apo platformave të ndryshme online, ka bërë që në tregun e telefonisë celulare të luhet shumë me këtë fakt.
Interneti për kompanitë celulare është kthyer në një fitim abuziv në kurriz të qytetarëve, sepse ato përveç çmimeve të tyre të shtrenjta krahasur me vendet e rajonit dhe ato europiane, paketat e interenetit i kanë shndëruar në një mjet fitimi.
“Ju keni konsumuar të gjitha GB e paketës suaj.”- është mesazhi më i padëshiruar i mundshëm që mbërrin në telefonat e qytetarëve shqiptarë nga kompanitë celulare. Ky refren përsëritet pas një kohe shumë të shkurtër që nga momenti kur ti aktivizon një paketë dhe ngelet enigmë se si Interneti konsumohet aq shpejt si me magji.
Për minutat nuk mund të themi të njëjtën gjë sepse ato i japin me pikatore e sigurisht që të gjithë mundohemi t’i përfundojmë sa më shpejt telefonatat. Duke qenë se në ditët e sotme komunikimi nëpërmjet telefonit e rrjeteve sociale është një nevojë bazike, askush nuk mund të rrijë pa paketat e famshme të ofertave që ofrojnë të treja kompanitë celulare në vendin tonë.
Përdor Vodafone, ALBtelecom apo ONE ? Ti mund të jesh abonent i njërës prej tyre, por në fund faturat që paguajmë kanë të njëjtën vlerë për të gjithë. Kjo nuk na habit aspak pas oligopolit që të treja kompanitë vendosën në muajin shkurt.
Qytetarët shqiptarë i kanë shprehur shpesh pakënaqësitë e tyre dhe një nga kompanitë e operimit celularë Vodafone është ndër më të akuzuarat.
GB dhe MB të mbarojnë para se të aktivizohen!
Por, pavarësisht denoncimeve të shumta nga qytetarët, asgjë nuk ka ndryshuar dhe Vodafone vijon me abuzimet.
Një tjetër denoncim ka ardhur së fundmi në redaksinë e “iconstyle.al”. Bëhet fjalë për një qytetare e cila ka kryer ditën e djeshme një rimbushje prej 200 lekësh, ndërkohë ka patur në llogarinë e saj 200MB.
Pas rimbushjes Vodafone i ka dhuruar të ashtuquajturën paketën “BONUS” që përmban: 50 MB, 50 SMS kombëtare dhe 50 minuta kombëtare.
Pra, në total 250 MB.
Mirëpo, surpriza ishte ruajtur për mëngjesin e ditës së sotme, kur Vodafone e lajmëron nëpërmjet 3 mesazheve të njëpasnjëshme fillimisht se ka përdorur 80% të paketës që përmban 200 MB. Më pas një tjetër mesazh në të njëjtin minutë shkruan se ka përdorur 100% të paketës që përmban 200 MB.
Pra, për pak sekonda paketa u konsumua. Dhe ende pa kuptuar se çfarë ndodhi me këtë paketë, zhduken edhe 50 MB e paketës “BONUS” që ia dhuroi Vodafone, pas rimbushjes.
Abuzimi thellohet edhe më tej, pasi krediti i saj shkon papritur në zero. Qytetarja na shkruan se nuk ka përdorur as internetin, as minutat dhe as mesazhet, por si paketat ashtu edhe lekët avulluan të gjitha në orën 11:41.
Kjo nuk është hera e parë që abuzimet të tilla ndodhi nga kjo kompani telefonike. Disa javë më parë pamë një rast ekstrem kur 6 GB janë konsumuar për 30 minuta. Diçka e tillë nuk ndodh edhe nëse Interneti do përdoret pa pushim për këto 30 minuta.
AKEP dhe Autoriteti i Konkurrencës heshtin ndaj shkeljeve ligjore
Paketa e Internetit, ashtu si çdo paketë tjetër, është një kontratë, pasi klienti njihet me ato element që përmban paketa vendos ta blejë dhe deri në këtë moment të dyja palët janë dakord, por kur kompania ndërpret Internetin duke dhënë justifikime qesharake, kemi të bëjmë me abuzime dhe shkelje të kontratës.
Si fillim, duhet që AKEP të bëhet aktiv në mbrojtje të qytetarëve dhe të përgjegjësive që ka si institucion. Po ashtu, në këto raste nga ana ligjore qytetari duhet t’i drejtohet gjykatës, pasi kontrata është shkelur.
Fatkeqësisht, qytetari shqiptar është i pambrojtur, qoftë nga AKEP, qoftë nga Autoriteti i Konkurrencës. Autoriteti i Komunikimeve Elektronike dhe Postare, si rregullatori i tregjeve të telefonisë në vend, ndonëse ka premtuar shpeshherë se do të marrë masa për uljen e tarifave celulare në vend, objektivat e tij rrallëherë kanë gjetur zbatim deri më tani në vend.
Përveç telekomunikacionit, Autoriteti i Konkurrencës ka zgjedhur mos të reagojë dhe t’i shërbejë interesave të kundërta nga ato që i parashikon ligji, që nga sektorët financiarë, të sigurimeve, bankarë, karburanteve, apo edhe testeve të Covid-19 (KLIKO), që “Iconstyle.al” i ka denoncuar prej muajsh.
