Fëmijët janë dhurata më e bukur që mund të marrë një çift! Asgjë nuk është e krahasueshme me ardhjen në jetë të një qenie të re, që do t’i japë jetës së partnerëve një tjetër kuptim dhe do të përmbysë përkufizimin që kishin për dashurinë.
Ndaj prindërit duket se nuk ndalen kurrë për t’i surprizuar vogëlushët e tyre, nuk dinë t’i thonë kurrë “Jo” për atë që kërkojnë dhe mund t’iu duket sikur asgjë nuk është e mjaftueshme.
Veshjet, lodrat dhe udhëtimet, duket se janë të mundura nga të gjithë. Por vetëm artistët arrijnë t’i lënë fëmijës së tyre një kujtim të përjetshëm: Një këngë.
Një muzikë, vargje dhe tinguj që do t’i këndojnë dhe do t’i kërcejnë të gjithë. Fëmijët e disa prej këngëtarëve shqiptarë patën fatin që ndër vite të bëheshin edhe më shumë të famshëm nga krijimtaria e prindërve të tyre.
“Jon” e Ardit Gjebreas
Mban emrin e Detit Jon, por në këngën e 1991-shit, këngëtari Ardit Gjebreas tregoi vuajtjet që kaloi bashkëshortja e tij për të sjellë në jetën fëmijën e tyre të parë. Një këngë kushtuar djalit të tij Jon, të përshkruar me fjalët më të ndjera për dhimbjet që kaloi populli shqiptar në atë kohë
“Jon, ky emër marrë nga deti/ Jon, me këngë vale tund djepin/ Jon, dhe ti ja ndjeve aromën/ Ta kesh për jetë me vete”.
“Noku vogël” i Noizy-t
Të gjithë e dimë që Noizy ka një vajzë të quajtur “Leandra”, e cila jeton në Londër. Në vitin 2012 ai publikoi një këngë të quajtur “Noku vogël” kushtuar vajzës së tij, duke i shprehur dashurinë dhe ndjenjën e mungesës që ka për të.
“Thesar pa emër” e Jonida Maliqi
Këngëtarja Jonida Maliqi ishte shtatzënë me djalin e saj Dan kur mori pjesë në festivalin “Kënga Magjike” të 2011-s me këngën “Thesar pa emër”. Ajo fitoi çmimin “Çesk Zadeja”.
Dy këngët e Kastro Zizos
Këngëtari ka dy fëmijë, një vajzë me emrin Nia dhe djalin Dankan. Së fundmi në festivalin “Kënga Magjike” ai konkurron me një projekt kushtuar të bijës, “Pa faj”, të kënduar me Rea Nuhun.
Ndërsa në 2014-n erdhi me një dedikim për të dy fëmijët e tij “Papalove”, të kënduar bashkë me Young Zerkën.
“Dhurata” e Alban Skenderajt dhe Miriam Canit
Më 28 Nëntor, në festen e Pavarësisë së Shqipërisë, çifti i njohur Alban Skenderaj dhe Miriam Cani publikoi këngën e tyre të re “Dhurata”. Ajo u publikua pikërisht në 2-vjetorin e vogëlushes së tyre Ameli.
