Një ngjarje e rëndë tronditi ditën e djeshme qytetin e Ferizajt në Kosovë, pasi një 18-vjeçare u dhunua për vdekje nga dy të rinj. Autorët e lanë të ndjerën pa ndjenja jashtë dyerve të një spitali dhe më pas u larguan. Kamerat e sigurisë së spitalit arritën të siguronin pamje të dy të rinjve, të cilët u shpallën menjëherë në kërkim nga policia.
Prokuroria Themelore në Ferizaj ka nisur hetimin ndaj D.K., për veprën penale “Vrasje e rëndë”, raporton Kosova Press. Po ashtu, është arrestuar shtetasi me iniciale A.S., nën dyshimin se është bashkëpunëtor në vrasje. Trupi i pajetë i të resë ndodhet në në Institutin e Mjekësisë Ligjore, për të bërë ekzaminimet përkatëse dhe për të zbuluar shkaqet e vdekjes.
Kjo ngjarje ka sjellë edhe reagimin e personazheve të njohur shqiptarë. Mes tyre ka reaguar i tronditur edhe këngëtari Gold Ag. Ai shprehet se sot është e vështirë t’i ruash vajzat dhe që shumë njerëz i dalin në mbrojtje antivlerave.
“Qef me pas qikë e zor me rujtë qikë. Del një i prishur n’tru e në zemër e këput si lule hala mirë pa çelë dhe në fund të gjithë e shajnë laperin e vrasësin, por për fat të keq një shumicë prej tyre çdo ditë e shajnë islamin e muslimanin. Ma shumë ju pengon namazi në rrugë se droga në shtëpi e shkolla. Ngushëllime familjes së vajzës, Zot na udhëzoi e na ruaj familjet tona”, shkruan Gold Ag në një postim.
