Protesta e banorëve të Unazës së Re degradoi në dhunë e përleshje paraditen e sotme. Të vendosur para Parlamentit, protestuesit çanë rrethimin e parë të formuar nga efektivët e policisë dhe po tentojnë të hyjnë në Kuvend, ku po zhvillohet seanca plenare.
Nga përplasja mes forcave të policisë dhe banorëve të Astirit është lënduar nëndrejtori i Policisë së Tiranës, Dhimitraq Ziu, si dhe një tjetër efektiv.
Protestuesit kanë hedhur shashka dhe fishekzjarre, ndërsa zona është mbuluar nga tymi. Banorëve të Unazës së Re u janë bashkuar edhe banorët e Shkozës.
Me pankarta në duar ku shkruhet “Të mjerë, të pashpirt, të çmendur”, si dhe për “Familjen japim jetën” protestuesit i kërkojnë qeverisë të mos preken shtëpitë, pa marrë vlerën e dëmshpërblimet me vlerën e tregut.
20 mjete të FNSH-së janë prezentë, si dhe shumë forca kanë hyrë në oborrin e Namazgjase për të qëndruar në gatishmëri në rast se situata mund të precipitojë.
