Policia e Kosovës ka arrestuar edhe infermieren e tretë, e dyshuar për sulmin ndaj një të moshuare në Pejë. Lajmi u konfirmua nga zëdhënësi i Prokurorisë Themelore në Pejë, Shkodran Nikçi, raporton Koha.net.
Ai deklaroi se e arrestuara e tretë dyshohet se filmoi momentin kur po keqtrajtohej e moshuara në shtëpinë e pleqve.
Dhëndri i të moshuarës e cila u keqtrajtua nga infermieret në shtëpinë e të moshuarve, Ezen Vala, ka thënë se të moshuarën po e merrnin, duke shtuar se e gjithë kjo ka ardhur pas publikimit të videos.
E moshuara e cila u dhunua brutalisht nga një infermiere e Shtëpisë së të Moshuarve në Pejë dhe u filmua rezulton se është nëna e një prej dëshmorëve të UÇK-së, Taulant Nura.
Ministrja e Drejtësisë, Albulena Haxhiu tha se përgjegjësi i shtëpisë së pleqve duhet të japë llogari për keqtrajtimin e gruas së moshuar. Ajo kërkoi nga qytetarët që të raportojnë tek autoritetet në rast se dyshojnë për keqtrajtim të familjarëve të tyre që gjenden në shtëpi të pleqve.
“Abuzimi që pamë sot, nuk mund të jetë i vetmi prandaj qytetarët duhet të bashkëpunojnë me institucionet në rast të dyshimeve për keqtrajtimin e familjarëve në shtëpinë e të moshuarve në Pejë, apo edhe në qendrat tjera të kujdesit ndaj këtyre kategorive. Hetimet duhet të thellohen”, shkroi ajo në Facebook.
Ndërkaq, ministri i Punëve të Brendshme në Qeverinë e Kosovës, Xhelal Sveçla, kërkoi që të përfshirët në këtë rast të dalin para drejtësisë.
“Veprime të tilla të dhunës janë të papranueshme kudo që ndodhin, por në veçanti janë më të rënda kur ndodhin brenda institucioneve që konsiderohen të ofrojnë ndihmë dhe përkujdesje”, shkroi ai në Facebook.
