Regjisori dhe kineasti, Dhimitër Anagnosti u nderua sot me dekoratën e lartë “Gjergj Kastrioti Skënderbeu” nga Presidenti i Republikës së Shqipërisë, Ilir Meta. Kjo ceremoni solemne u mbajt edhe me rastin e 85-vjetorit të lindjes së Anagnostit. Dekorata e lartë “Gjergj Kastrioti Skënderbeu”, ju dha me motivacionin: “Në vlerësim të personalitetit gjenial, i cili dominoi në mënyrë të pamohueshme me veprat e tij të jashtëzakonshme historinë e kinematografisë shqiptare, duke e lartësuar dhe përfaqësuar atë me dinjitet brenda dhe jashtë vendit. Me mirënjohje ndaj mjeshtrit të artit filmik, i cili u dhuroi artdashësve shqiptarë dhe të huaj shpirtin e vet autentik, duke krijuar një sërë kryeveprash filmike, që do të shkëlqejnë në çdo epokë”.
Dhimitër Anagnosti nuk mundi të fliste gjatë, por u shpreh i lumtur për këtë vlerësim dhe falenderoi të gjithë njerëzit që kanë punuar me të për vite të tëra. Megjithatë regjisori i shquar kishte shkruar një letër të cilën e lexoi bashkëshortja e tij, Roza Anagnosti.
“Ky shkruan unë po ia lexoj dhe shpesh ia interpretoj. Diku dikur kam shkruar, në pleqëri njeriut i dobësohet shikimi sepse nis të shoh brenda vetes se sa jashtë saj. Juridikisht jam i pavdekshëm sepse ADN. ime udhëton në përjetësi përmes brezave në vijim. I them këto rreshta që të bisedoj me fëmijët e mi, më fëmijët e tyre me breza më tej e më tej, për të kuptuar çfarë i jep jetës nxitje, energji e kuptim.
Si të jetohet ajo më mirë në kuptimin material, intelektual, moral dhe emocional. Duhet të bëjmë kujdes në ndërtimin e jetës, ta ngremë kokën hera herës nga problemet e përditshme dhe të shikojmë yllin polar për të mos humbur drejtimin e rrugëtimit. Në këtë vend, në këtë truall ku brezat kanë derdhur energji fizike, intelektuale, morale, shpirtërore, rrezatohet një energji misterioze e shumëllojshme, që ta bënë jetën më të lehtë, më të plotë, më me kuptim, energjia e memories historike”, kishte shkruar Anagnosti në letrën e tij.
Ndërsa Roza mes emocionesh u shpreh se ndihet me fat që ka një bashkëshort si Dhimitri pranë dhe se për të ai vazhdon ende të jetë 20 vjeç.
“Unë jam me fat që kam pasur në krah një bashkëshort të tillë që bashkë kemi mbështetur njëri-tjetrin, në vështirësi dhe në të mirë, në gëzime dhe hidhërime. Bashkë me fëmijët tanë të cilët, Junën e kam këtu bashkë me bashkëshortin Tonin edhe dua të përmend edhe vajzën tonë Era, e cila është larg, por me zemër dhe shpirt është këtu. Na kanë lënë mundësi me mbarëvajtjen e tyre që ne të punojmë mirë dhe të vazhdojmë për popullin tonë me emocione, me një popull të mrekullueshëm që kemi.
Ju falënderoj për herë të dytë të gjithëve sepse kjo pandemi na krijoi një jetë tjetër dhe shpresoj që shumë shpejt të kalojë, që arti të marrë atë energji, se ky popull energjik nuk duron dot, nuk i mjafton vetëm buka, po do dhe emocionin, do dhe artin, do dhe kulturën edhe të gjithë këto”, u shpreh Roza Anagnosti në fjalën e saj.