Trupi i artistit legjendar Prince është djegur gjatë së premtes në një ceremoni fare të thjeshtë (1.600 dollarë), siç është mësuar të ketë qenë dëshira e tij.
Ky është momenti kur hiri i Prince u mor në makinë (nga motra Tyka) për t’u dërguar për në vendin final të pushimit. Ylli i muzikës u gjet i vdekur në shtëpinë e tij në Minnesota në enjten më 21 prill dhe familja e tij bëri një funeral të thjesht, që ai kishte kërkuar në rast të vdekjes së tij.
Dhe teksa familja e tij ishte mbledhur në shtëpinë e të ndjerit këtë fundjavë, kunati i tij ka rrëfyer se ylli i muzikës, përpara se të vdiste, kishte kaluar 6 ditë e gjysmë pa gjumë, duke punuar pa pushim.
Fansa të shumtë kanë rrethuar shtëpinë e Prince, në Paisley Park, ku iu shpërndanë pako me dhurata për qindra prej tyre, që bënë homazhe për legjendën e muzikës.
Ende nuk dihet cili është vendi ku është hedhur hiri i tij dhe mësohet se ceremonia mortore ka qenë tepër intime, ku prezentë kanë qenë vetëm familjarë dhe miq të afërt.
Që prej ditës së enjte, kur Prince u nda nga jeta në moshë 57-vjeçare, ende nuk është përcaktuar shkaku i vdekjes së tij. Megjithatë, shefi i policisë së kontesë, ka bëre dije se vdekja e tij nuk ka qenë një vetëvrasje.
Burimi: Daily Mail
