Masat që ka ndërmarrë qeveria shqiptare për të përballuar pandeminë e COVID-19 kanë qenë kontradiktore e shpesh të pamjaftueshme. Që në mars të vitit të kaluar, kur i gjithë vendi u mbyll totalisht ende qëndronin hapur fasoneri, call ceneter e biznese të tjera që nuk prodhonin të mira bazike për shoqërinë.
Edhe tani kur vendi është në një mbyllje të dytë e me orare të kufizuara, masat e marra bien ndesh me aktivitetin ekonomik që qëndron hapur.
Auditoret janë të mbyllura, kjo pasi grumbullimi në hapësira të vogla i shumë njerëzve përbën rrezik infektimi. Mbase ky është vendimi i duhur duke ditur kapacitetet që kanë universitetet tona që janë të tejmbushuar edhe në kohë normale.
Por sa të efektshme janë këto masa në një kohë kur bare, kafene e restorante qëndrojnë të hapura e bëhen pika grumbullimi?
Kjo e tregon qartë dështimin me menaxhimin e pandemisë dhe se ekonomia jonë nuk është në gjendje të përballojë një mbyllje totale të dytë pasi fondet shkojnë për koncesione dhe afera korruptive.
Ja cilat janë disa nga masat më kontradiktore që ka marrë qeveria shqiptare në përballje me COVID-19:
- Pikë së pari vendi u mbyll totalisht dhe hapur qëndruan sektor të panevojshmë të prodhimit si fasoneri, miniera etj. Në të njëjtën kohë që vendet e punës ishin hapur, u mbyll transporti publik duke mos i lënë njerëzve alternativa kur ishin të detyruar të lëviznin.
- Mbyllja me orare vetëm sa solli grumbullimin dhe dyndjen e njerëzve në markete e tregje për të siguruar ushqimet e nevojshme.
- Më pas u mor vendimi për mbajtjen e maskës në ambiente të hapura në një kohë që u hapën lokalet dhe gjithë ekonomia. Me pak fjalë, mund të ulesh në një kafene me 6 njerëz të tjerë e të mos mbash maskë, por në momentin që del nga kafeneja në rrugë je i detyruar ta vendosësh.
- E fundit ishte vendimi për mbylljen e auditoreve në një kohë që qëndronin hapur vende të tjera grumbullimi.
Pa gjykuar vendimin për mbylljen e auditorëve, na lind e drejta të gjykojmë hapjen e sektorëve të panevojshëm të ekonomisë. Fondi që u akordua në ndihmë të bizneseve dhe individëve të larguar nga puna në mars të vitit të kaluar ishte qesharak dhe kjo është prova se taksat e shqiptarëve shkojnë në vendin e gabuar për investime dhe në momentin që shifrat e pandemisë u rritën qeveria e kishte të pamundur të përballonte një mbyllje të dytë ekonomike të vendit.
Ndoshta të frikësuar nga rikthimi i studentëve në auditore, qeveria mori vendimin që fakultetet të qëndronin të mbyllura. As nuk u mendua që mund të përdoreshin testime të shpejta në çdo fakultet, të siguroheshin ambiente më të mëdha apo forma alternative për zhvillimin e mësimit. Me sa duket prioritet për shtetin janë bizneset dhe jo studentët.
