Ndërron jetë në moshën 70-vjeçare, Diana Rakipi, e njohur si “Burrnesha e Durrësit”. E moshuara, kishte humbur kontaktet me familjarët e saj prej ditësh. Fatkeqësisht, ajo u gjet e pajetë brenda banesës ku jetonte. Dyshohet se “Burrnesha e Durrësit” ka ndërruar jetë si pasojë e një infrakti.
Kush ishte Diana Rakipi?
70-vjeçarja ishte bijë në një familje me shumë fëmijë (3 vëllezër e 5 motra). Diana ishte dëshmi e gjallë e traditave të vjetra shqiptare, të përfshira në kanunin e Lek Dukagjinit, ku virgjëreshat e betuara, apo burrneshat, janë gra që ndërmarrin një betim dëlirësie dhe veshin rroba mashkullore për të jetuar si burra në shoqëritë patriarkale të Shqipërisë Veriore, Kosovës dhe Malit të Zi.
Diana u betua për t’u kthyer në burrneshë gjatë kohës që Shqipëria ishte ende nën regjimin komunist. Ajo përçonte herë pas here mesazhe të forta për vajzat:
“Bëhuni të zonjat e vetes merreni fatin tuaj në dorë dhe mos u dorëzoni kurrë përballë asgjëje”.
