Dikur deputete, sot kritikuese e tyre. Ish-deputetja Lajla Përnaska, e ftuar në “Top Show” i ka quajtur deputetet e Kuvendit të Shqipërisë, “kukulla Barbie”, të cilat nuk kanë asnjë lidhje me profesionin e ligjvënëses.
“Një kontingjent i rëndësishëm i femrave sot në Kuvend s’kanë lidhje me të. Kanë lidhje me gjithçka përveçse me Parlamentin. Gratë sot në Kuvend janë thjesht “barbie doll” dhe ne këto fenomene po i përjetojmë shumë shpesh.
Statusi i politikanit është i veçantë dhe ka barrë përgjegjësie të lartë, ndaj dhe imazhi është pjesë e rëndësishme, por ka kritere dhe standarde, pasi është rol institucional që duhet të respektohet. Nëse do të isha në krye të institucionit do kërkoja respektim të kodit të veshjes. Secili institucion publik duhet ta kërkojë një gjë të tillë”, deklaroi ajo.
Përnaska u fokusua më tepër në mënyrën e veshjes së ish-kolegeve të saj, pasi sipas saj veshja e tyre në Kuvend sot lë vend për kritika.
