Kosova vijon të jetë e paprekur nga Koronavirusi të paktën deri në këtë moment që flasim. Këtë të hënë u dyshua për një paciente se ishte e prekur me virusin vdekjeprurës pas qëndrimit për disa ditë në Itali, por pas analizave ajo rezultoi negative.
Mediat kosovare raportojnë se bëhet fjalë për një grua rreth të 30-ave, e cila sapo ishte kthyer në Kosovë pas disa ditësh pushime në Itali. Ajo u shtrua mbrëmjen e të dielës në Klinikën Infektive në Kosovë me shenja të gripit dhe pas dyshimeve iu bë edhe analiza e Koronavirusit.
Instituti Kombëtar i Shëndetit Publik, ka bërë me dije se ajo ka rezultuar negative. IKSHP njoftoi se pacientja ka pasur ethe, djegie të syve dhe rrjedhje hundësh.
Kjo nuk është hera e parë që në Kosovë dyshohet për një rast me koronavirus. Disa ditë më parë bëhej fjalë për një shtetase kineze, por edhe ajo pas analizave rezultoi negative. Deri më tani janë marrë në studim tre raste në Kosovë, por të treja kanë rezultuar negative.
