Prej 12 ditësh banorët e zonës së “Astirit” po protestojnë kundër prishjes së banesave të tyre, për të bërë projektin e “Unazës së Madhe”. Ditët e fundit protesta është zhvendosur në Bashkinë e Tiranës, por situata këtë të enjte doli jashtë kontrollit.
Banorët kanë hedhur tymuese, vezë dhe shashka drejt godinës së Bashkisë. Turma i është afruar kordonit të policisë duke tentuar ta çajë atë dhe të futet brenda ndërtesës.
Rreth 200 banorë po tubojnë duke e quajtur projektin korruptiv, ndërsa mbajnë banderolën ku shkruhet “MASHTRIM”.
Sipas mediave, ditën e sotme janë shtuar uniformat blu që ruajnë godinën, ndërsa banorët u shprehën se iu refuzua leja për të protestuar.
Ndërkohë që jashtë zhvillohet protesta, brenda godinës po zhvillohet normalisht mbledhja e Këshillit Bashkiak.
Protestuesit kërkojnë dëmshpërblim të plotë për shtëpitë që do të prishen, të legalizuara apo jo.
Burimi: BalkanWeb
