Era Istrefi bëri krenarë të gjithë shqiptarët, pas performancës historike të këngës himn “Live it Up”, në finalen e Kupës së Botës, në bashkëpunim me Will Smith dhe Nicky Jam.
Një ditë më parë, Era Istrefi u prit si një heroinë e vërtetë në Kosovë nga vetë presidenti i vendit, i cili e dekoroi atë duke e cilësuar si “Zëri i Kosovës në botë”.
Mirëpo jo të gjithë e kanë mirëpritur këtë vendim të Thaçit, pasi ka nga ata që mendojnë se Era nuk e meriton këtë titull.
Një ndër ta është edhe sociologu shqiptar Ergys Mertiri, i cili shprehet se Era Istrefi është vetëm komerciale dhe nuk ka asnjë vlerë artistike si artiste. Sipas tij, dekorimi është në kuadrin e kompleksit të inferioritetit kulturor që shqiptarët shpërfaqin në mënyrë të frikshme dekadat e fundit.
“Ti japësh Era Istrefit medaljen jubilare të 10 vjetorit të pavarësisë do të thotë të kesh ngatërrim zorrësh në tru, do të thotë të degjenerosh vlerat më të thella të një shoqërie që ia doli të çlirohet nga një robëri 100 vjeçare, duke i shkartisur këto me vlerat e një kulture që promovon gjithçka profane e vulgare si konsumin, vanitetin, mendjelehtësinë, të mosmenduarit, të qenit bosh, egoizmin, banalitetin etj. Ky lloj pseudoarti është modeli më i keq që mund ti ofrojmë shoqërisë e sidomos të rinjve”, shkruan sociologu në një status të gjatë në profilin e tij në “Facebook”.
Sipas Ergys Mërtirit, kjo situatë nuk është vetëm në Kosovë, por edhe në Shqipëri.
“Mesazhi që na vjen nga presidenca në Kosovë, siç ndodh rëndom edhe në Shqipëri është i trishtë. Ky shtet nuk interesohet për vlerat, kulturën dhe artin e vërtetë, por vlerëson dhe nderon vetëm çingijet, ndërsa favorizon gjithmonë kopukët, kurvat dhe hajdutët!” – përfundon shkrimin sociologu.
Statusi i plotë:
https://www.facebook.com/ergys.mertiri/posts/1047690922061065
