Një memorial turk është ngritur në Tiranë pranë Parkut të Liqenit Artificial, për viktimat e atij që u cilësua si grusht shteti i 15 korrikut 2016 në Turqi.
Ky memorial mban emrin e 251 qytetarëve turq të vrarë për mbrojtjen e presidentit Erdogan, ndërsa Bashkia e Tiranës ka mbjellë aty edhe 251 pemë të sjella nga Turqia, në nder të tyre.
Kjo është hera e parë që në Tiranë ngrihet një memorial për viktimat e një grushti shteti të huaj dhe ka hasur mjaft debat në opinionin publik.
Ky debat u përshkallëzua sot në një reagim të ashpër nga disa persona ende të paidentifikuar, të cilët kanë hedhur mbi të letër higjenike dhe sende të tjera në simbol të refuzimit të këtij memoriali në vendin tonë.
Mbi të është lënë një letër ku shkruhet: “Respekt për këdo që nuk jeton më, por ky monument nuk na përket neve, i përket ish pushtuesve tanë. Bërë në datë 11.08.2019 paqësisht në vend demokratik”.
Ndaj këtyre ka reaguar edhe vetë kryebashkiaku Veliaj, i cili tha se ata që ankohen për këtë çështje, as nuk u ka rënë në mendje për atë pjesë të Parkut e cila dikur ishte zaptuar e mbuluar me ferra e plehra.
Sipas Veliajt, ky memorial nuk i prish punë askujt dhe nuk është tradhti.
“Tirana zemërmadhe ka vend për të gjithë. Ndaj, për të gjithë ata që vapa e gushtit i kapi në ngut për fletërrufe, s’ka ndodhur asnjë hata, le më tradhti apo ndonjë shkelje e kësaj natyre. Pushime të mbara të gjithëve dhe gëzuar festën”, tha Veliaj, raporton Top Channel.
E ndërkohë që opinioni publik vlon nga këto deklarata, pyetja që lind është përse është vendosur ky memorial turk për turqit në Tiranë?
Para se të përgjigjemi, duhet të dimë edhe një lajm tjetër që u bë publik ndërkohë që zhvillohej debati i memorialit.
Emri i Adem Jashari, i cili ra dëshmor bashkë me 56 shokë dhe familjen në luftën për pavarësinë e Kosovës, është përjetësuar që prej vitit 2015 në Stamboll. Emrin e tij e mban një park i ndërtuar në lagjen Vatan, pranë rrugës Esenler.
