Të gjithë nxënësit që nuk kapën dot fazën e parë të regjistrimit për klasën e parë apo të dhjetë për arsimin parauniversitar, do të kenë mundësi të aplikojnë nga data 21 gusht deri më 1 shtator.
Ministrja e Arsimit, Sportit dhe Rinisë, zonja Evis Kushi përmes një postimi në rrjete sociale bëri të ditur datat e dyta të regjistrimit në klasat e para dhe të dhjeta përmes sistemit e-Albania.
“Me ndryshimet që miratuam në ligjin për Arsimin Parauniversitar, edhe vogëlushët që mbushin 6 vjeç deri në datën 31 dhjetor do të kenë mundësi të ️regjistrohen në klasë të parë për vitin e ri shkollor 2023–2024.
Të gjithë prindërit që mendojnë se fëmijët e tyre, edhe pse ende nuk i kanë mbushur 6 vjeç e kanë tashmë zhvillimin dhe përgatitjen e duhur, si dhe kanë dëshirë t’i regjistrojnë ata në klasë të parë, janë të ftuar të aplikojnë në sistemin e-Albania nga data 21 gusht deri më 1 shtator. Ky afat vlen edhe për të gjithë ata prindër që nuk kanë arritur dot të bëjnë gjatë fazës së parë regjistrimet për fëmijët e tyre në klasën e parë dhe të dhjetë.”-shkruan ministrja Kushi.
