Zhurma e madhe që u bë pas një dasme në Shijak, ku disa dasmorë përfunduan në spital, tani ka një arsye zyrtare. Analizat toksikologjike kanë rezultuar negative në lidhje me dyshimin, për helmim ushqimi të dasmorëve të shtruar pak ditë më parë në spitalin e Durrësit. Kryeinspektoria e Inspektoratit Shëndetësor, Xhaneta Saliu, deklaroi se fakti që dasmorët janë ndjerë keq, nuk ka të bëjë me helmim të ushqimit.
Sipas saj, Inspektorati Shëndetësor dhe AKU-ja kanë kryer analizat toksikologjike dhe ka rezultuar që ato të dalin negative. Në këto kushte, pas bllokimit disa ditor, pritet që restoranti të rifillojë aktivitetin e tij.
Pas daljes së analizave toksikologjike ka ardhur edhe reagimi i pronarit të lokalit në të cilin u zhvillua ceremonia martesore. Durim Kapo, në një deklaratë për News 24, thotë se ka mbetur i tronditur nga fakti që dasmorët mund të kishin pësuar helmim ushqimi. Me garancinë e rezultateve të analizave toksikologjike, Kapo mendon se shkak për përkeqësimin e shëndetit të dasmorëve mund të jetë bërë kondicioneri, i cili ishte graduar disa gradë nën normalen.
“Unë fajin ua kam vënë kondicionerëve. Ne atë natë bëmë një gabim, i kishim lënë shumë ulët. Madje e kam diskutuar edhe me kryekamerierin tim, pasi i thashë se mund të kemi ‘një problem’. Më shkau situata nga duart, faji është i imi”, tha Durim Kapo për News 24.
Ngjarja ndodhi pak ditë më parë. Pas dasme, rreth 13 dasmorë u shtruan në Spitalin e Durrësit me diarre, të vjella dhe temperaturë të lartë. Gjithsesi situata është ende e paqartë, pasi ende nuk është zbuluar se çfarë mund ta ketë shkaktuar helmimin e 50 dasmorëve. Por pavarësisht se u hodh poshtë, arsyeja e helmimit nga ushqimit besohet se mbetet shkaku kryesor për dasmorët.
