Një ftesë e veçantë, brenda së cilës gjendet një letër me barkode, ku pasi e skanon me celular mëson datën 27 korrik të dasmës së Orinda Hutës me Turjan Hyskën, u ka mbërritur miqve të çiftit pak ditë më parë. Kanë nisur të shpërndahen edhe ftesat e veçanta dhe të pazakonta nga të tjerat, ku brenda gjenden disa degë lulesh levander.
Siç e thamë, surpriza gjendet në copëzën e letrës , që ndodhet brenda cilindrit prej qelqi. Nëse të gjithë të ftuarit në këtë copëz letër prisnin të gjenin adresën dhe orën e dasmës, janë gabuar, pasi kjo ishte e gjitha një surprizë më vete për ta.
Në letër ndodhej një QR Code, i cili duhej skanuar, vetëm përmes skanimit janë mësuar detajet e tjera të ceremonisë. Duket se ky “trik”, siç e ka quajtur vetë Orinda surprizën brenda ftesave, i ka argëtuar dhe i ka vënë në mendime paksa të ftuarit. Ceremonia , që po organizohet është konceptuar si një dasmë plot kode dhe të papritura që e bën edhe më interesante pjesëmarrjen në këtë ceremoni VIP .
Turi dhe Orinda do të celebrojnë kështu 10-vjetorin e lidhjes së tyre të dashurisë. Ceremonia do të nisë nga ora 19:00 me ngjitjen në altar, koktejin për miqtë dhe darkën e madhe për të cilën çifti kanë preferuar të mbajnë ca sekrete për të respektuar temën e dasmës, që do të jetë e koduar. Çifti interesant i “showbiz”-it, që karrierën e tyre e kanë bërë mes muzikës dhe televizionit, në një nga intervistat e fundit janë shprehur se kanë planifikuar të bëhen prindër.
Për ta ceremonia e ngjitjes në altar do të jetë thjesht një festë, pasi kanë vite që bashkëjetojnë në Tiranë. Në intervistat, 31-vjeçari dhe 29- vjeçarja janë përgjigjur se u pëlqen të mos bëjnë plane, edhe pse preferonin që pas arritjes aty ku duhet në karrierë, të vazhdonin me martesën dhe pastaj me sjelljen në jetë të fëmijës së parë.
