Roza Anagnosti ka treguar sot historinë e njohjes me bashkëshortin regjisor Dhimitër Anagnosti.
Në një intervistë për Rudina Magjistarin, aktorja e nderuar shqiptare rrëfeu momentet e para kur vuri re që Dhimitri e pëlqente:
Ajo tha se ishin në Shkodër me xhirime dhe Dhimitri, i cili rrinte gjithnjë me syze dielli në atë kohë, e vështronte:
“Më dukej sikur gjithmonë e kishte shikimin drejt meje dhe unë kthehesha. Se atëherë ishte koha ndryshe, një shikim, një prekje kishte kuptim. Ndonjëherë më shihte në kamera dhe më thoshte, nuk e ke bërë mirë”.
Të kesh regjisor bashkëshortin ka të mirat dhe jo të mirat e veta, tha aktorja e njohur, sepse “ai është shumë kërkues”, shtoi ajo. Roza tregoi raste kur bashkëshorti e kritikonte, dhe ajo përpiqej gjithnjë të ishte korrekte, madje më shumë se ç’duhej.
Dhe kur Roza i kërkonte më pas llogari partnerit ai e mbyllte shpejt diskutimin me shprehjen, “Tani mbaroi 8 orarëshi, hajde të ikim në shtëpi”.
“Për mua është idhull si bashkëshort, koleg, për mbështetjen e jashtëzakonshme, motivi që më nxiti vazhdimisht për karrierën. Ai ka vlera kombëtare për kontributin e tij”, vijoi aktorja.
/Iconstyle.al
