Sandër Lleshi u emërua nga kryeministri Edi Rama në postin e Ministrit të Brendshëm, mëngjesin e së shtunës. Në një intervistë për “Opinion” me gazetarin Blendi Fevziu, Lleshi tregoi se ka veshur uniformën ushtarake që në moshën 14-vjeçare. Plot humor, ai fajësoi median, pasi dashuria për këtë profesion lindi pikërisht nga një revistë ushtarake.
Sipas tij, jo vetëm mësuesja por edhe familjarët, i dolën kundër kësaj dëshire duke e vlerësuar si një zgjedhje të gabuar.
“Në klasën e 8 rashë në kontakt me një revistë ushtarake. Fantazia e fëmijës u zgjua dhe vendosa të shkoj në shkollën ushtarake. Takova mësuesen time dhe i thashë se do shkoj në shkollën ushtarake. Mësuesja dhe familja më doli kundër që të mos shkoja. Por në këtë rast fitoj fëmija. Shkolla ushtarake ishte një shkollë spartane, e fortë dhe shumë ushtarake dhe fizike. Pastaj shkova në Akademinë Ushtarake dhe zgjodha një degë teknike, pra u specializova tek radarët”, – u shpreh Ministri i Brendshëm Sandër Lleshi.
Në 2013-ën, Rama e zgjodhi Sandër Lleshin këshilltarin e tij për mbrojtjen. Në atë kohë kreu i qeverisë shpjegoi se ndikim për zgjedhjen e tij e kishte pasur edhe nga shkrimtari Ismail Kadare. Gjeneral Sandër Lleshi ka mbajtur në 2010, postin e zv.shefit të Shtabit të Përgjithshëm të Forcave të Armatosura të Shqipërisë. Në periudhën 1996- 2000, gjeneral Lleshi ka qenë komandant i Kurseve në Akademinë e Mbrojtjes në Tiranë dhe më pas, për tre vjet të tjera, ishte komandant i Akademisë Ushtarake “Skënderbej”. Në vitet 2003-2006, ka shërbyer si atashe i Mbrojtjes i Republikës së Shqipërisë në Gjermani.
