Kënga “Sonte” u reklamua me shumë mençuri nga ana e Luana Vjollcës, e cila vendosi ta linte surprizë këngëtarin me të cilin kishte bashkëpunuar.
Kur më në fund u zbulua se ishte këngëtari i njohur i muzikës folklorike në Kosovë, Ramadan Krasniqi, ishte me të vërtetë e papritur.
Këngëtari, i cili njihet më së shumti me nofkën Dani, tregoi sesi erdhi ky bashkëpunim dhe mesa duket, ishte Luana ajo që e kishte zgjedhur Danin dhe e kishte ftuar të bëhej pjesë e duetit.
Kurse Dani, pranoi vetëm pasi dëgjoi këngën “Sonte”, të cilën thotë se ia mbushi mendjen pasi dëgjoi si e kishte kënduar Luana në demo.
Ai u shpreh për emisionin “Mirage”:
“Luana e kishte inçizuar këngën dhe kishin rënë dakort që kënga duhet të ishte bashkëpunim. Më mori në telefon dhe më tha që kam bërë një këngë, është e përfunduar dhe kemi menduar për ty. “Faleminderit shumë”, i thashë dhe e lamë që nesër të shkoja të dëgjoja këngën. Shkova, e dëgjova, më pëlqeu melodia, teksti dhe Luana si e kishte kënduar.”
Dani rrëfeu gjithashtu se çdo gjë kishte ndodhur shumë shpejt, brenda vetëm pak ditëve.
3 javë nga publikimi, klipi i këngës “Sonte” ka arritur 2,1 milion klikime.
“Klikimet janë reale.”, shprehet Dani, i cili shton: “Luana ishte shumë pozitive, më pëlqeu shumë dhe ishte shumë skenike.”
Edhe vitin e kaluar, Luana ndoqi të njëjtën strategji, duke bashkëpunuar me një nga artistët më të njohur të muzikës tradicionale, Bujar Qamili.
Bashkë, ata risollën një prej këngëve të njohura të Bujar Qamilit, “M’i dhe flakë mallit tim”.
