Janë publikuar pamjet kur grabitësit e 10 milionë eurove në Rinas, hynë me furgon në aeroport duke hapur derën e rrethimit që përdoret nga shërbimet zjarrfikëse.
“Shqiptarja.com” ka suguruar fotot në të cilat shihet se pasi kanë zbritur nga makina, grabitësit kanë hequr dy barriera betoni para derës së hekurit, të cilën e kanë hapur fare lehtësisht duke këputur zinxhirin.
Më pas ata kanë hipur sërish në furgon, më saktë në pjesën e pasme të tij, teksa shoferi vazhdon rrugëtimin drejt pistës së avionit ku ndodhi grabitja e 10 milionë eurove.
Fugoni ka hyrë nga ana e parkingut në aeroport dhe është afruar deri tek dera që më pas edhe kanë mundur që ta hapin.
Pas kësaj, një furgon i forcave të policisë që ka ardhur nga brenda aeroportit, i ka ndjekur grabitësit që në pistë, por ata janë përgjigjur duke qëlluar me armë.
Në foto shihet se dera e furgonit të grabitësve është e hapur, pasi autorët kanë qëlluar me armatimet e rënda që kishin. Edhe Forcat e Ndërhyrjes së Shpejtë u janë kundër përgjigjur në një hark prej dy kilomtrash larg aeroportit, derisa vranë njërin prej grabitësve, Admir Muratajn.
Murataj i identifikuar pak më parë nga familjarët, është një nga 5 grabitësit e maskuar, të cilët vodhën 10 milionë euro të katër bankave të nivelit të dytë, që duhet të transportoheshin drejt Vjenës.
/Shqiptarja
