Nga 9 marsi e deri tani në vendin tonë janë regjistruar 383 të prekur nga COVID-19, teksa në 24 orët e fundit janë shënuar vetëm 6 raste të reja, numri më i ulët i shënuar në 2 javët e fundit.
Sakaq, deri më tani janë shënuar 22 viktima nga COVID-19, ndërsa janë shëruar 131 persona.
Sipas Ministrisë së Shëndetësisë në spitalin Infektiv aktualisht ndodhen 6 të shtruar, ku 5 prej tyre janë në terapi intensive, ndërsa në spitalin COVID 2, ‘Shefqet Ndroqi’, ndodhen 7 pacientë, 6 prej të cilëve në terapi intensive, ku 3 janë intubuar.
Për herë të parë, që kur në Shqipëri u shfaq rasti i parë me koronavirus, sot në Ditën Botërore të Shëndetit, janë publikuar edhe pamjet nga spitali Infektiv, ku trajtohen të sëmurët me COVID-19.
Disa minuta më parë, ministrja e Shëndetësisë dhe Mbrojtjes Sociale, Ogerta Manastirliu, ka publikuar një video në Facebook, ku ka vlerësuar maksimalisht mjekët, infermierët dhe të gjithë punonjësit e shëndetësisë, në përballjen me COVID-19.
“Dita Botërore e Shëndetit i gjen infermierët, mjekët, punonjësit tanë të shëndetësisë në vijën e parë të fronit me këtë armik të rrezikshëm. Një armik që me sy nuk duket por që shumëkujt në mbarë botën po ua merr njerëzit e dashur mu përpara syve. Sot, mirënjohja e të gjithëve shkon për ata që mbi përparësen e bardhë veshin çdo ditë armaturën mbrojtëse ne betejën e radhës në emër të jetës”, tha Manstriliu.
Teksa është shprehur se në spitalin Infektiv dhe “Shefqet Ndroqi” po bëhet një punë e jashtëzakonshme, Manastirliu u ka bërë thirrje të gjithë qytetarët të respektojnë masat e vendosura, në mënyrë që t’ua shlyejmë sadopak borxhin që u kemi mjekëve dhe infermierëve për t’u lehtësuar punën, ndërkohë që janë publikuar pamje nga ambientet e brendshme të spitalit Infektiv.
“Të gjithë këtyre luftëtarëve ne u kemi një borxh të madh. Një borxh që në këtë kohë të vështirë që po jetojmë mundemi t’ua shlyejmë pak e nga pak duke u’a lehtësuar mundin përballë sëmundjes, duke respektuar rregullat dhe duke u bërë bashkë aleatë besnikë të mjekëve dhe infermierëve tanë të mrekullueshëm”, tha Manastirliu .
/GazetaReforma.com
