Dita e hënë shënoi protestën e dytë pas ngjarjes së rëndë të javës së shkuar ku u vra 7-vjeçarja Jonada Avdia e cila u përplas nga skafi i drejtuar nga polici Arjan Tase.
Qytetarë të shumtë u mblodhën para Ministrisë së Drejtësisë, për të protestuar pas ngjarjes së rëndë me moton “Nuk e vrau varka, por shteti”.
Protestuesit i vendosën afat kryeministrit për të larguar nga detyra Ministrin e Brendshëm, Bledi Çuçi, Ministren e Kulturës, Mirela Kumbaro dhe Drejtorin e Përgjithshëm të Policisë, Gledis Nano.
Mes protestuesve të shumtë është parë edhe Bora Zemani e cila ka marrë pjesë së bashku me djalin e saj mes qytetarëve të thjeshtë.
Videoja është filmuar nga personat e pranishëm në protestë, por vetëm sot është bërë virale në rrjet.
Deri më sot, Bora nuk kishte bërë asnjë lloj reagimi në rrjetet sociale lidhur me ngjarjen e rëndë. Duket se moderatorja ka vendosur të reagojë më së miri në fshehtësi, duke protestuar krah qytetarëve të tjerë.
Kujtojmë se në protestën e parë ka qenë i pranishëm gjithashtu reperi Stresi (Arkimed Lushaj), i cili u fotografua pranë moderatores Valbona Mëhilli.
Shumë personazhe të tjerë kanë reaguar të prekur në rrjetet sociale duke shprehur ngushëllimet e tyre për 7-vjeçaren, por asnjëri prej tyre nuk ishin pjesë e protestës.
