“Kopështi zoologjik i ferrit” – kështu e quan “Daily Mail” kopështin zoologjik “Safari” të Fierit.
Disa foto të bëra në kopshtin zoologjik “Safari” në Fier ku duken disa kafshë të burgosura në kushte aspak të përshtatshme po bëjnë xhiron e botës pasi janë publikuar nga prestigjozja “Daily Mail”.
Kafshë që duken të kequshqyera dhe të keqtrajtuara në kopështin zoologjik, një luan kockë e lëkurë dhe jeton me një sy të infektuar në një kafaz të ngushtë, që gjithashtu është shtëpia e një ujku, një zebre, disa drerëve, një majmuni dhe një ariu.
Të gjitha këto kafshë jetojnë brenda një hapësire private të rrethuar nga betoni dhe një ambient aspak i pastër që nuk ofron për ta as kushtet minimale, hije dhe ujë.
Një fotograf anonim, i cili ka fotografuar gjendjen e këtyre kafshëve tha për “Daily Mail” se këto ishin kushtet më të tmerrshme që kishte parë ndonjëherë për mirëqënien e kafshëve.
“Kafshët vuajnë nga një sërë çështjesh fizike dhe psikologjike të shkaktuara nga kushtet e mjerueshme, kujdesin veterinar dhe mungesa e një diete të përshtatshme”- tha fotografi.
Organizata Ndërkombëtare e Mirëqenies së Kafshëve, “Four Paws” e cila ka qenë aktive në Shqipëri vitet e fundit, e quajti situatën në kopshtin zoologjik absolutisht të papranueshme.
“Gjendja në Parkun Safari nuk është e përshtatshme, veçanërisht për kafshët e mëdhae të egra si luani dhe arinj që kanë nevoja specifike mjedisore dhe dietike”- tha Ioana Dungler, e cila kryeson Departamentin e Kafshëve të “Four Paws”.
“Daily Mail” u bën thirrje gjithashtu autoriteteve shqiptare që të nxitojnë të ndërmarrin masat e duhura kundër këtij parku privat.
