Një ditë pasi gazeta britanike “Daily Mail” bëri publik shkrimin në lidhje me kushtet skandaloze të kopshtit zoologjik në Fier, kanë ndërhyrë edhe autoritetet shqiptare. Inspektorët e mjedisit kanë vë re një sërë parregullsirash dhe kanë njoftuar se kafshët do të zhvendosen diku tjetër.
“Bëhet pezullim i menjëhershëm i aktivitetit, ka mangësi në dokumentacion duke nisur nga procedurat e çdoganimit si dhe kemi kërkuar një raport nga institucionet e specializuara për gjendjen shëndetësore të kafshëve. Mund të bëhet sekuestrimi i tyre dhe zhvendosja e tyre diku tjetër duke parë mundësitë e dikasterit tonë”, shprehet Bibe Dodaj, Inspektor ISHMPUT.
Ndërkohë që për televizionin “Top Channel”, pronari i këtij kopshti zoologjik, është shprehur se kafshët e egra janë trajtuar sipas standardeve dhe se artikulli i medias britanike është abuziv. Sipas pronarit të kopshtit zoologjik, kafshët janë kontrolluar në muajin korrik nga veterinerë të huaj dhe ky fakt vërtetohet edhe nga vetë autoritetet lokale.
“Ky aktivitet ka qenë në monitorim nga ana jonë dhe 2 muaj më parë të gjitha kafshët janë kontrolluar dhe vaksinuar nga veterinerë të huaj”, thotë Ardian Koci, Drejtor AKZM, Fier.
Burime pranë Ministrisë së Mjedisit kanë bërë të ditur për “Top Channel” se kafshët mund të zhvendosen në kopshtin zoologjik të Tiranës, ndërkohë që një tjetër opsion është të transportohen jashtë vendit drejt qendrave të specializuara për këto kafshë të egra.
