Kohët e fundit kemi dëgjuar jo pak personazhe të famshëm të cilat kanë pranuar publikisht se kanë vuajtur nga depresioni. Madje pas rasteve të shumta të vetëvrasjeve, në media po i kushtohet gjithmonë e më shumë vëmendje kësaj teme, në mënyrë që njerëzit të ndërgjegjësohen dhe ta pranojnë që depresioni është një sëmundje e cila mund të kurohet.
Së fundmi për këtë çështje ka folur edhe këngëtarja shqiptare Dafina Zeqiri. Ajo ka publikuar në Instastory një shkrim të aktores Jada Pinket Smith, e cila flet për pasojat e depresionit duke u nisur nga vetëvrasjet më të fundit që kanë tronditur botën e showbiz-it. Jada ka rrëfyer gjithashtu se dhe ajo ka vuajtur nga depresioni.
Nisur nga ky postim edhe këngëtarja shqiptare, Dafina Zeqiri ka gjetur guximin të pranojë publikisht se dhe ajo ka vuajtur nga depresioni.
“…shumë gjëra për të cilat familja dhe fansat e mi nuk e kanë menduar kurrë se i kam kaluar”, ka shkruar Dafina sipër fotos ku shfaqet shkrimi i Jada-s.
Ndërsa në një postim të dytë në Instastory Dafina ka thënë se depresioni mund të jetë i dukshëm dhe nuk duhet të mashtroheni nga një buzëqeshje.
“Depresioni është real dhe mund të jetë i dukshëm. Mos u mashtroni nga një buzëqeshje. Flisni! Kujdesuni për njëri-tjetrin! Mos e merrni mirësinë për dobësi! Mos e merrni dashurinë, besnikërinë dhe mbështetjen të garantuar! Ju dua me gjithë zemër!”, ka shkruar Dafina.
