Qindra shqiptarë kanë mbushur rrugët e Londrës me makina luksoze gjatë natës për të festuar 110-vjetorin e pavarësisë së Shqipërisë.
Në videot e shpërndara në internet shihen automjete luksoze si Lamborghini, Mercedes, Audi, Range Rover dhe Porsche 4×4, që bllokuan trafikun rreth Westminster, ndërsa oficerët e Policisë Metropolitane përpiqeshin të lëviznin automjetet.
Në klipe të ndryshme shihen burra dhe gra duke valëvitur flamurin shqiptar teksa varen nga xhamat e makinave të tyre dhe duke u rënë borive.
Në një artikull të “Daily Mail”, shkruhet se makinat kryenin rrotullime në rrugë ndërsa të rejat që ishin në rrugët e Londrës kishin veshur fustane tradicionale dhe kërcenin në rrugë.
Gjithashtu nuk munguan fishekzjarret, ndërsa vargu i gjatë i automjeteve u binin vazhdimisht borive për të festuar pavarësinë e Shqipërisë, e cila përkujtohet çdo vit më 28 nëntor.
Festimet mbrëmë shënuan tubimin e dytë të madh të shqiptarëve në Londër këtë muaj pas protestave kundër Sekretares së Brendshme dy javë më parë.
Një grup protestuesish ndezën tërbim dhe vendosën flamurin tonë mbi statujën e Winston Churchill në Sheshin e Parlamentit më 12 nëntor, ndërsa protestuan kundër deklaratave të bëra nga Suella Braverman.
Më shumë se 1500 protestues u mblodhën në Urën Ëestminster dhe marshuan drejt Pallatit të Westminsterit duke i kërkuar qeverisë që t’i respektojë ata si njerëz dhe të drejtat e tyre njerëzore, duke deklaruar: “Jo të gjithë shqiptarët janë kriminelë”.
Sekretarja e Brendshme u kritikua nga partitë opozitare për gjuhën e ashpër që përdori në Commons në fillim të këtij muaji.
