Veçanërisht gjatë sezonit të verës dëgjon dhe shikon pafund “gafa” shqiptare. Ndërsa bizneset mundohen që të përfitojnë sa më shumë nga pushuesit dhe turistët e huaj, ndonjëherë nuk njohin kufi për të fituar edhe 10 lekë më shumë.
Një situatë e ngjashme në kufijtë e sarkazmës ka ndodhur në Jug të vendit, ku një turist britanik është detyruar të paguajë edhe për kryerjen e nevojave në tualetin e restorantit ku ka qëndruar.
Një qytetar F.T, ka publikuar në “Facebook” këtë status:
“Një kolegu im anglez, pas shumë bisedave të lira me të, sigurisht pas interesimit personal të tij për Shqipërinë dhe fjalëve superlative, këtë vit vendosi të vizitonte bashkë me të shoqen vendin e shqiponjave. Ai udhëtoi në disa qytete të Shqipërisë dhe ishte mjaft entuziast dhe mjaft i ndjeshëm me celularin e tij, duke pëlqyer, falënderuar dhe ndjerë pozitivitet për Shqipërinë me fotot që ai postonte herë pas here në Facebook. I pëlqeu ushqimi, mjaft interes kishte për njerëzit, ndjeu bujari, respekt, por nuk nguroi të më pyeste dhe për një faturë që e solli me mesazh. Fatura e tij kishte këtë togfjalësh: “Bërje shurre” në krahun e të cilit ishte dhe pagesa 40 lekë. Fatura me ketë togfjalësh të bënte dhe të qeshësh, por dhe të qash në vetvete. E pashë me kujdes. E rishikova përsëri. Nuk dija si të përgjigjesha. Nuk dija vërtet. Pas disa ditësh e pashë një të ngjashme të postuar dhe nga E. Hysa në Facebook ku kishte dhe një shtesë tjetër: “Vlera pa TVSh B 20 … 33.33” dhe TVSH B 6,67” ku më pas thuhej se TOTAL Lek 40,00” dhe shkruhej se ishte paguar me “Para në dorë: 40, 00”. Jepej dhe numri i regjistrit elektronik, data dhe kuponi tatimor nr. …”. Kjo kishte ndodhur më 16/09/2015, pra dy vjet më parë. Dhe në këtë kupon nuk mungonte stema e RSH dhe nënshkrimi i Institucionit MF”, përfundon postimi i tij.
Ndërsa fatura është bërë virale në rrjetet sociale, na dëshmon sërish pse çdo vit zhgënjehen dhjetëra vizitorë të huaj dhe shqiptarë.
