Edhe pse dhjetëra libra janë hequr nga qarkullimi për cilësi te dobët, çuditë me tekstet në shkolla nuk mbarojnë. Ky është një nga librat që përdoret për orën e Vendlindjes për nxënësit e klasave të pesta në Tiranë.
Është botuar në vitin 2008 dhe gjatë këtyre viteve nuk është rishikuar asnjëherë, për të pasqyruar ndryshimet e ndodhura në jetën e kryeqytetit. Autori ka mbetur në kohen e qeverisë së drejtuar nga Sali Berisha dhe bashkisë me kryetar Edi Ramën, ku Tirana ka ende 11 minibashki.
Në 146 faqe, krahas të dhënave të gabuara për ditët e sotme, në libër gjen me shumicë reklama biznesesh private. Madje edhe vendndodhjen e rrugëve e lidh me pozicionin e bizneseve që kanë ndihmuar në botimin e librit.
Teksti i Vendlindjes është jashtë katalogut të miratuar nga ministria. Për këtë arsye në disa shkolla lejohet të blihet dhe në shkolla të tjera e mbajnë vetëm mësuesit, ndërsa fëmijët marrin shënime.
Pas shqetësimit të ngritur edhe nga një grup prindërish të shkollës “Emin Duraku”, vetëm sot, drejtoresha e shkollës u ka komunikuar fëmijëve të mos e mbajnë në çantë.
Ndërsa Ministria e Arsimit nuk ka asnjë reagim për këtë botim qesharak, për ditët e sotme, edhe pse kjo lëndë zhvillohet 2 herë në javë./Vizion Plus
