Pa bërë 24 orë vendi ynë është kthyer në një “arenë” të frikshme vrasjesh e ngjarjesh tragjike. Dëshmi se autoritetet e kanë humbur prej kohësh “fuqinë” e nuk po veprojnë më në mbrojtje dhe sigurinë e qytetarëve.
Tre vrasje, një vetëflijim dhe një plagosje me armë zjarri kanë tronditur vendin këtë mbrëmje.
Të shtëna me armë zjarri janë raportuar në Velipojë, ku dy persona kanë humbur jetën. Njëri Ardis Hoxha dhe tjetri Ersild Ishmi, punëtor i një prej hoteleve në zonë. Ngjarja ka ndodhur në afërsi të stacionit të autobusëve të Velipojës.
Viktimat u qëlluan për vdekje nga 2 vëllezër dhe sipas policisë shkak për ngjarjen e rëndë qëndrojnë motivet e dobëta.
Një tjetër ngjarje tronditëse ka ndodhur në Tiranë, ku burri ka vrarë gruan dhe më pas dy qentë e tij dhe veten.
Krimi i rëndë në familje ka ndodhur në lagjen Laprakë. Shtetasi amerikan, Matthew James Wertz 55 vjeç fillimisht ka mbytur gruan e tij, Indah Lilis Sartika Saragih dhe më pas ka vrarë me shkop bejsbolli dy qentë e tij.
Krimin ai e ka rrëfyer në një letër ku i drejtohet të atit: Baba më fal, nuk ja dal dot. Më fal për çfarë bëra ishte më e fortë se unë. Më fal për çfarë bëra…
Pas letrës dhe vrasjes së gruas dhe dy qenëve të tij është vetëvarur. Policia në njoftimin zyrtar ka raportuar vetëm për vetëvrasjen e 55-vjeçarit.
Pasditen e sotme në Komunë të Parisit efektivi Erjon Goxhara qëlloi me armë zjarri 45-vjeçarin Lorenc Kosta për motive banale.
Goxhara më herët ka qenë komandant i repartit Shqiponja, ndërsa aktualisht punonte si punonjës i policisë kufitare.
Çfarë po ndodh? Ku janë autoritetet? Edhe sa tragjedi do të vuajë vendi ynë? Ende pa u shëruar nga “plagët” e vrasjes së padrejtë të Egli Progës, qytetarët janë lënë në mëshirë të fatit ndërsa vendi “gëlon” nga vrasjet.
