Gazetarja Anduena Llabani ka bërë së fundmi një status të gjatë për dy vëllezërit e njohur Romeo dhe Donald Veshaj, informon voxnews.al.
Ajo ka shkruar se aktorët e humorit kanë probleme me drejtësinë për një ngjarje që ka ndodhur në vitin 2017.
Llabani informon se vëllezërit Veshaj janë dënuar nga Gjykata e Vlorës për veprën penale “plagosje e rëndë me dashje”, kryer në bashkëpunim.
“Dy vëllezërit Veshaj, fytyra të njohura të ekranit, rezultojnë prej disa vitesh në përballje me drejtësinë. Kjo pasi në vitin 2017, ata janë dënuar nga Gjykata e Vlorës për veprën penale “plagosje e rëndë me dashje”, kryer në bashkëpunim (Neni 88/1 e 25 i Kodit Penal). Përballë një vendimi të butë të dhënë nga shkalla e parë e gjyqësorit, ku dy vëllezërit vijonin të lirë dhe apelit të Prokurorisë, shkalla e dytë e la në fuqi vendimin e shkallës së parë. Mirëpo e pakënaqur me vendimin e Apelit, Prokuroria e Vlorës e ka dërguar rastin për rishqyrtim në Gjykatën e Lartë”, shkruan gazetarja.
Po tani çfarë do të ndodhë?
Më tej, gazetarja thekson se data e seancës së parë për dy vëllezërit e njohur të ekranit do të jetë pikërisht 27 maji.
Kujtojmë që Donald dhe Romeo momentalisht po drejtojnë programit “Më lër të flas” në Top Channel.
Më tej, ajo shkruan se “ngjarja për të cilën akuzohen dy vëllezërit duket se ka kaluar në heshtje, ashtu sikundër dënimi i cili i ka lënë jashtë qelisë dy aktorët”.
Gjithashtu, Llabani ka publikuar edhe “Nenin 88” për veprën penale “Plagosja e rëndë me dashje”.
Në të thuhet se plagosja e rëndë me dashje dënohet me burgim nga 3 deri në 10 vite.
“Plagosja e kryer me dashje që ka sjellë si pasojë gjymtimin, shëmtimin ose çdo dëmtim tjetër të përhershëm të shëndetit, ndërprerjen e shtatzënisë, ose ka qenë e rrezikshme për jetën në çastin e shkaktimit të saj, dënohet me burgim nga tre gjer në dhjetë vjet. Po kjo vepër, kur është kryer kundër disa personave, kundër personit që është bashkëshort, ish-bashkëshort, bashkëjetues apo ish-bashkëjetues, gjini e afërt ose krushqi e afërt me autorin e veprës penale, ose kur ka sjellë si pasojë vdekjen, dënohet me burgim nga pesë deri në pesëmbëdhjetë vjet. Plagosja e rëndë, e kryer në gjendje të tronditjes të fortë psikike të çastit, shkaktuar nga dhuna ose fyerja e rëndë nga ana e të dëmtuarit, dënohet me burgim gjer në pesë vjet”, përfundon shkrimin gazetarja pas citimit të nenit.
Nga ana tjetër, ende nuk dihet ndonjë informacion shtesë lidhur me këtë ngjarje. Madje, as Romeo e as Donaldi nuk kanë bërë asnjë reagim deri në këto momente.
