Alexei Navalny, disidenti rus që i mbijetoi helmimit nga agjentët e inteligjencës së Kremlinit, u transferua nga burgu ku po qëndronte në një vend të panjohur të martën, duke nxitur frikën për sigurinë e tij.
Kira Yarmysh, një zëdhënëse e liderit të burgosur të opozitës, tha se një avokat i cili kishte shkuar për të vizituar 45-vjeçarin në një kamp burgu në Pokrov, 119 km (74 milje) në lindje të Moskës, të martën, kishte biseduar me rojën, ku ky i fundit i kishte thënë: “Këtu nuk ka asnjë të dënuar të tillë”.
“Ne nuk e dimë se ku është tani Alexei dhe ku po e çojnë”, shkroi Kira Yarmysh në Twitter.
Ajo tha se asnjë nga familja apo avokatët e tij nuk ishin njoftuar për ndonjë transferim.
“Ne nuk e dimë se ku është Alexei, por detyra jonë kryesore tani është ta gjejmë atë sa më shpejt të jetë e mundur.”
Navalny, kritiku më i shquar i presidentit rus Vladimir Putin, u helmua me Novichok gjatë një udhëtimi fushate në Siberi në gusht 2020.
Pasi u shërua në një spital në Berlin, ai habiti njerëzit duke u kthyer në atdheun e tij.
Në kthimin e tij në janar 2021, Navalny u arrestua dhe u burgos për shkelje të lirimit me kusht, duke shkaktuar protesta të gjera në Rusi.
