Pandemia e COVID-19 i vuri edhe njëherë në dukje dallimet e theksuara që ekzistojnë mes më të pasuarve dhe më të varfërve. Edhe pse virusi nuk ka bërë përjashtime dhe shumë njerëz janë infektuar pavarësishit statusit të tyre social, ndryshe qëndron me ata që realisht kanë mundur të kurohen.
Kostot e kurimit nga COVID-19 në Shqipëri arrijnë shifra të larta, të papërballueshme nga një pjesë e mirë e njerëzve. Ashtu si një pjesë e mirë e sektorit publik në Shqipëri, edhe shëndetësia ka vuajtur nga shkurtimet neoliberale të viteve të fundit. Privatizimi i gjithçkaje që nga spitalet e deri te koncesioni i analizave ka bërë që qytetarët të kenë pasur vështirësi në aksesin e shërbimeve të nevojshme.
Por sa janë kostot e kurimit nga COVID-19?
Duke filluar që nga testimi PCR që shpesh qytetarët detyrohen ta kryejnë në klinika private, që kushton minimalisht 97 euro, shifrat janë tepër të larta. Ndërkohë testi serologjik kushton 4000 (mijë) lekë të reja. Këto shifra krahasuar me të ardhurat e familjeve shqiptare, do të thonë muaj kursime, apo ditë pune për të mbulur vetëm shpenzimet e COVID dhe asnjë shpenzim tjetër.
Ndërkohë kostot e ilaçeve variojnë si shifrat e mëposhtme sipas Euronews.al:
Fatura e mjekimit 10 ditor në shtëpi për COVID-19 (Me simptoma të mesme)
Cefepime- 13 216 lekë
Dexametason- 470 lekë
Rivaroxaban- 7 676 lekë
Omeprazol-1 104 lekë
Total- 22 466 lekë
Fatura e mjekimit 10 ditor në shtëpi për COVID-19 (Me simptoma të lehta)
Levofloxacine- 1 600 lekë
Azitromicinë- 1 300 lekë
Rivaroxaban- 3 838 lekë
Dexametason- 470 lekë
Total- 7 208 lekë.
Këto janë vetëm kostot e ilaçeve, por kurimi i virusit është i shoqëruar edhe me shpenzime të tjera. Një skaner i mushkërive në një klinikë private kushton minimalisht 24000 lekë të reja, i cili mund të përsëritet disa herë në varësi të avancimit të virusit. Në rastin më të keq, kur një pacient ka nevojë për oksigjen një bombol oksigjeni shkon e pakëta 500-600 euro.
Shtuar këtyre edhe kostot e ripësëritjes së testit (që tashmë nuk është i detyrueshëm pas 14- ditësh), që në disa raste pacientët duhet ta kryejnë, shpenzimet për kurimin e COVID-19 shkojnë në shifrat 1000-1500 euro, para të cilat një pjesë e mirë e familjeve shqiptare as nuk i kanë.
Por ndryshe nga një pjesë e mirë e të infektuarve, ka pasur edhe një pakicë të privilegjuarish që kanë zgjedhur të kurohen jashtë vendit, në Turqi ose Itali. Sërish sipas Euronews, janë rreth 270 shqiptarë që kanë zgjedhur të kurohen jashtë vendit që nga muaji mars i pandemisë deri në nëntor të vitit të kaluar. Kostoja e kurimit jashtë vendit shkon nga 25 mijë deri në 50 mijë euro, duke pëfshirë udhëtimin me charter dhe kurimin spitalor.
Natyrisht spitalet jashte vendit ofrojnë kushte më të mira dhe mundësi më të mëdha shërimi për pacientët se sa në Shqipëri.
Që nga fillimi i pandemisë në vendin tonë është dëgjuar vetëm për mungesë kitesh për tamponë, mungesë shtretërish, mungesë mjekësh një pjesë e mirë e të cilëve janë larguar drejt Gjermanisë dhe më fatalja kanë qenë morgje të tejmbushura. Këto ishin probleme me të cilat u përballën një pjesë e mirë e vendeve europiane, por ndryshe nga to, në Shqipëi u trumbetua me të madhe se situata ka qenë gjithnjë në kontroll dhe se ne i kemi kushtet për të përballuar pandeminë. Nëse është kështu;
- Pse më të pasurit kanë zgjedhur të kurohen jashtë vendit, kur kushtet në spitalet tona janë mjaft të mira?!
- Pse shumë njerëz zgjedhin të kurohen në shtëpi duke mos u besuar mjekëve dhe siptaleve?!
- Pse testimet nuk bëhen falas dhe në laboratore publike?!
Këto pyetje mbeten ende pa përgjigje, pavarësisht se prej ditësh në vendin tonë ka mbërritur vaksina. Kjo e fundit erdhi pa bujë dhe pa bërë publike asnjë të dhënë, pas një skandali të qeverisë që darkon me oligarkët në Dubai, ndërkohë që shqiptarët vuajnë pasojat e pandemisë.
Keqmenaxhimi dhe nënvlerësimi i pandemisë, vunë në dukje jo vetëm politikat e korrruptuara me të cilat mbahet shëndetësia dhe gjithë sektori publik, por theksuan edhe më shumë faktin se janë gjithnjë më të pasurit ata që i bëjnë ballë çdo situate.
