Një studim i fundit rrit shpresën për kapërcim të shpejtë të situatës pandemike, teksa pacientë pozitivë mundën t’u bënin ballë shumë më shpejt virusit, fill pas trajtimit me një ilaç eksperimental të hepatitit. Personave në fjalë, të cilët shfaqnin simptoma mesatare iu dha peginterferon-lambda, një proteinë që ndihmon vënien nën kontroll të sëmundjeve të frymëmarrjes, duke aktivizuar qelizat e sistemit imunitar.
Studiuesit zbuluan se pacientët që morën një injeksion të tillë patën katër herë më shumë gjasa të shfaqnin një ngarkesa tepër të lehtë virale brenda shtatë ditësh, krahasuar me pjesën tjetër.
Ekipi nga Qendra e Torontos deklaroi se gjetjet japin prova se ilaçi mund të ndihmojë në frenimin e përhapjes së virusit në komunitet.
“Ky trajtim ka një potencial të madh terapeutik, veçanërisht në këtë moment ku po hasim variante agresive të virusit që përhapen anembanë globit, të cilat janë më pak të ndjeshme si ndaj vaksinave, ashtu edhe ndaj trajtimit me antitrupa”, tha Dr. Jordan Feld.
Peginterferon-lambda konsiderohet si katalizator i qelizave imune, të cilat luftojnë sëmundje të ndryshme. Shumica e trajtimeve eksperimentale është duke u studiuar te pacientët e shtruar në spital, por studiuesit duan të shohin nëse peginterferon-lambda mund të ndihmojë në shmangien e nevojës për shtrim në spital.
