Covid-19 na mori një tjetër figurë të njohur të artit shqiptar. Bëhet fjalë për kantautorin Kujtim Prodani, i cili është ndarë nga jeta ditën e djeshme. Lajmin e hidhur e ka dhënë fillimisht Elton Deda, i cili ka ndarë një mesazh shumë prekës në rrjete sociale.
“Mossss! Pse o vëllai jonë? Çfarë gëzimi kishin bisedat me ty, mirësia jote, zotnillëku jot, qytetari ideal… nuk e besoj dot. Nuk të them dot lamtumirë… por do të të pres për një birrë kur të duash ti”, shkruante Deda në postimin e tij.
Lajmin e infektimit Prodani e dha vetë 1 javë më parë përmes një postimi në rrjete sociale. Ai publikoi një foto nga spitali, në të cilën shfaqej me një maskë oksigjeni në fytyrë.
“Sa miq e sa të afërm na more, o flamë e keqe! (Klinika Shefqet Ndroqi)”, shkruante kantautori i ndjerë në postimin e tij.
I afërmi i tij dhe këngëtari i njohur Voltan Prodani, ka shpërndarë një foto të momenteve të fundit të kantautorit nga ambientet e spitalit Covid 2.
“Foto e fundit nga i shtrenjti ynë. Këtë foto nuk do ta harrojë kurrë gjithë jetën. Fluturo o shpirt i lirë”, shkruan ai krahas fotos.
Para disa muajsh Prodani bëri një këngë me titull “Ju flet corona”, dedikuar kësaj kohe të vështirë që na kujtoi të gjithëve se në fund të fundit e rëndësishme është që të jesh një njeri i mirë, sepse jeta është shumë e shkurtër. Gjatë vitit që lamë pas Kujtim Prodani publikoi albumin “Prodan” dhe këngën “Hej mik”.
