Conan O’Brien do të rikthehet sërish në skenën më të madhe të Hollywood-it. Akademia e Filmit ka konfirmuar se komediani dhe prezantuesi i njohur do të moderojë ceremoninë e 99-të të Oscars, e planifikuar të mbahet më 14 mars 2027 në Dolby Theatre në Los Angeles. Kjo shënon herën e tretë radhazi që O’Brien merr drejtimin e eventit prestigjioz, pas pritjes pozitive që mori në dy edicionet e fundit.
Lajmi është pritur me entuziazëm nga fansat e ceremonisë, pasi stili ironik dhe energjia e tij në skenë janë konsideruar si një nga arsyet që Oscars ka rikthyer interesin e publikut vitet e fundit. Gjatë monologut të këtij viti, Conan shkaktoi të qeshura kur u shpreh me humor se kishte “nderin të ishte prezantuesi i fundit njerëzor i Oscars”, një batutë që u bë menjëherë virale në rrjetet sociale.
Bashkë me të do të rikthehen edhe producentët ekzekutivë Raj Kapoor dhe Katy Mullan, të cilët do të kujdesen edhe këtë herë për realizimin e spektaklit. Drejtuesit e Akademisë, Bill Kramer dhe Lynette Howell Taylor, vlerësuan ekipin duke theksuar se Conan ka sjellë një frymë të re në ceremoninë më të rëndësishme të industrisë së filmit.
Sipas raportimeve, Oscars ka shënuar rritje të konsiderueshme të audiencës që prej ardhjes së O’Brien si moderator. Në vitin e tij të parë si prezantues, ceremonia u ndoq nga afro 19.7 milionë shikues. Ndërkohë, edhe pse edicioni i fundit pati një rënie të lehtë në televizion, angazhimi në rrjetet sociale u rrit ndjeshëm.
Oscars 2027 do të transmetohen live në ABC, ndërsa mediat amerikane raportojnë se nga viti 2029 ceremonia mund të zhvendoset në një platformë të re transmetimi dhe në një tjetër lokacion në Los Angeles.
