Një vit i ri, aventura të reja! Ekspertët e CNN, ndërsa konsultuan për sportet e preferuara të tyre përreth botës, kanë zgjedhur 17 vendet më të mira për të pushuar në 2017-n. Në listën e CNN renditet edhe Shqipëria!
Në “vendin e vogël mesdhetar” do të gjeni “diell, çmime të lira dhe plazhe të paprekura kilometër pas kilometri”, lexohet në artikullin e CNN.
Më tej, shtohet se “ushqimi shqiptar ngjan me atë grek, por çmimet janë shumë më të lira, sesa në vendin fqinj, Shqipëria do të vazhdojë të lulëzojë në 2017-n”.
“Shteti po gjen një jetë të dytë për disa nga mijëra bunkerët, testamente të shkatërruara të paranojës së ish-të fuqishmit stalinist, Enver Hoxha. Në periferi të kryeqytetit Tirana, Bunk’Art transformoi kompleksin nëntokësor të Hoxhës në një qendër kulturore. Disa dhoma tregojnë historinë e diktatorit shqiptar përmes ekspozitave dhe artifakteve, dhomat e tjera janë lënë bosh. Në zemër të kompleksit është një auditor, dizajnuar për qeverinë e Hoxhës në fshehtësi, por tani i ridizajnuar si një sallë për koncertet “jazz”, vazhdon artikulli.
Në “Facebook”, kryeministri Edi Rama shkroi se ky artikull tregon se vendi po rritet çdo vit e më shumë.
“Mbase këta që e rendisin Shqipërinë në 17 destinacionet për t’u vizituar këtë vit, dinë të shohin atë që jo pak ndër ne nuk duan ta shohin tek ky vend, i cili po rritet çdo vit e më shumë si vend turistik jo vetëm sepse është i bukur po edhe sepse po flitet çdo vit e më mirë për të”, lexohet në postimin e kreut të qeverisë.
Burimi: CNN
