Dy artistët dhe dy prej emrave më të preferuar të muzikës shqiptare, Bardhi dhe Melinda Ademi kanë shtyrë koncertin në “Stadiumin e Qytetit” në Preshevë që ishte i organizuar për ditën e sotme.
Ka qenë Bardhi që ka njoftuar nëpërmjet një postimi në llogarinë personale të Instagram-it, teksa është shprehur se iu është anuluar performanca për shkak të “keqkuptimeve të policisë”. Megjithatë ai nuk ka preferuar të ndajë më tepër detaje lidhur me çështjen.
“Mbrëmja në Preshevë që ishte paraparë të mbahet sonte do të shtyhet për disa ditë”, nis postimi i Bardhyl Idrizit, i njohur si Bardhi.
“Unë dhe Melinda me dëshirën më të madhe ishim duke ardhur, edhe me riskun tonë. Por mbrëmja u shty për shkak të disa keqkuptimeve me policinë e shtetit”, shtoi ai.
“Nesër në mëngjes ju informojmë për datën tjetër që do të mbahet këto ditë. Ju duam shumë”.
Ata këtë kohë janë të angazhuar me mbrëmje e koncerte përreth trojeve shqiptare.
