Rritja e çmimit të bukës shqetësoi gjithë qytetarët shqiptarë, që duhet të japin më shumë nga xhepi i tyre për një nga produktet që konsumojnë më tepër. Ky çmim erdhi si pasojë e rritjes së vlerës së miellit dhe produkteve të tejra me të cilat bëhet buka.
Nisur nga situata ku çmimi i bukës është rritur nga disa njësi tregtare në mënyrë të menjëhershme dhe kur tregtarët e miellit kanë lajmëruar rritje të çmimit, Autoriteti i Konkurrencës si rrallëherë ka paralajmëruar kompanitë grosiste të importit të grurit dhe importit të prodhimit të miellit. Nga një hetim i kryer një vit më paë ka rezultuar se 5 kompanitë e prodhimit dhe tregtimit të miellit kanë bashkërenduar sjelljen duke caktuar çmimet e shitjes dhe duke kontrolluar në këtë mënyrë prodihimin në tregun e miellit.
Autoriteti i Konkurrencës iu vendosi ndërmarrjeve të hetuara detyrimin të mos caktojnë, në mënyrë të drejtpërdrejtë ose të tërthortë, çmimet e blerjes ose të shitjes, apo çdo kusht tjetër tregtimi, të mos kufizojnë ose kontrollojnë prodhimin, tregjet, zhvillimin teknik ose investimet, të mos ndajnë tregjet ose burimet e furnizimit, të raportojnë çdo 3 muaj pranë AK-së të dhëna mbi blerjet dhe shitjet në përmbushje të detyrimeve të dhëna sipas kësaj pike. Autoriteti konkurrencës kujton se ne periudhën njëvjeçare qe nga dalja e vendimit ky treg vazhdon te jete nën monitorim dhe se do merren masa për moszbatimin e rregullave për paracaktimin e çmimeve.
Kjo është hera e parë që Autoriteti i Konkurrencës shqetësohet dhe bën një lëvizje. Për kompanitë që tashmë kanë krijuar oligopole duke fituar në kurrizin e konsumatorëve shqiptarë nuk është marrë asnjë masë. Mjafton të përmendim këtu kompanitë celulare, karburantet apo shërbimet bankare që kanë bashkërenduar gjithmonë çmimet me njëra-tjetrën dhe Autoriteti i Konkurrencës nuk ka marrë asnjë lloj vendimi.
Në mënyrë të qartë dhe në shumicë institucionet rregullatore të tregjeve dhe Autoriteti i Konkurrencës, që lidhet drejtpërdrejtë me këto çështje, dhe që paguhen nga taksapaguesit shqiptarë për të mbrojtur interesat publike, me veprimet dhe mosveprimet e tyre i shërbejnë interesave të tilla me shenja të qarta subjektivizmi dhe korrupsioni.
Duke qenë se Autoriteti i Konkurrencës ka mbyllur më herët hetimet në lidhje me oligopolet e kompanive telefonike dhe ka lënë zvarrë shumë çështje të tjera, shpresojmë që rasti i grosistëve të miellit të mos përfundojë në të njëjtën mënyrë!
