Banorët e disa zonave në Greqi kanë përjetuar një natë tmerri pas kalimit të ciklonit ‘Ianos’ në këto territore. Sipas raportimeve të mediave greke, cikloni i fuqishëm goditi ishujt e detit Jon, Peleoponezin Perëndimor, Kardicën dhe Thesalinë, duke shkaktuar edhe viktimën e parë.
Bëhet fjalë për një të moshuar në fshatin Farsala, afër Larisës, ndërkohë, që edhe dy persona në Kardica rezultojnë të zhdukur. Sipas mediave greke, bëhet fjalë për një grua, të cilën e rrëmbyen shirat e furishëm bashkë me makinën e saj si dhe për një fermer. Ndërkohë, 645 banorë janë të bllokuar në shtëpi, ndërsa evakuimet nga forcat speciale EKAM dhe zjarrfikëset kanë vijuar përgjatë gjithë natës.
Mediat greke bëjnë me dije se si pasojë e stuhisë së fuqishme, 3 punëtorë qëndruan 10 orë mbi pemë, kur makina u rrëmbye nga lumi i furishëm, derisa përfundoi me sukses operacioni i evakuimit në Almiro.
Ndërkohë sot, në ditën e tretë të rrugëtimit të tij, parashikohet që uragani do të godasë me të njëjtën fuqi Jugun e Gadishullit të Peloponezit, në Greqinë Qendrore (Sterea) dhe në Kretën perëndimore.
Gjatë orëve në vijim, parashikohet që të ketë reshje të furishme dhe erëra të fuqishme në zonat lindore dhe jugore të Greqisë tokësore, në jug të detit Jon, në veri të ishullit Evia, ishujt verior dhe perëndimor të kompleksit Cyklades, Chania në Kretë dhe ishujt e Egjeut. Autoritetet bëjnë me dije se uragani ‘Ianos’ ka arritur mëngjesin e sotëm në Athinë e zonat përreth, ndërsa fenomeni është ende në zhvillim. (Për të parë videon kliko këtu)
Burimi: Gazeta Reforma
