Një miqësi që nuk është më e tillë. Është shumë më shumë! Marrëdhënia mes modeles Cara Delevingne dhe artisti Jaden Smith shkoi në një tjetër dimension, pas puthjes së tyre në publik, e cila u shkëmbye në ditën e Shën Valentinit. Jaden i dha Cara-s një buqetë me trëndafila të kuq, e ndërsa kjo e fundit i dhuroi disa përqafime të zjarrta.
Cara njihet për përfshirje në histori dashurie me Miley Cyrus-in, Jake Bugg-un, Michelle Rodriguez-in, St. Vincent-in, Paris Jackson-in dhe Ashley Benson-in. Nga ana tjetër, Smith numëron gjithashtu romanca të shumta me Madison Pettis-in, Stella Hudgens-in, Kylie Jenner-in, Amandla Stenberg-un, Sarah Snyder-in dhe Odessa Adlon-in.
Qershorin e vitit të shkuar, Cara e cilësoi veten panseksuale, duke shtuar se gjithmonë do të mbetet e tillë. Të jesh panseksual do të thotë të mos tërhiqesh nga gjinia por vetëm nga personi, pa marrë parasysh nëse ai është mashkull apo femër. Pra, orientimi seksual apo identiteti gjinor nuk ka aspak rëndësi. Modelja pranoi se bie në dashuri me personin dhe gjithmonë e ka ndjerë këdo me të cilin/cilën ka qenë e lidhur.
“Unë mendoj se panseksualiteti është arsyeja pse kam prirjen ta mbaj jetën time shumë më private tani, sepse e bërë publike, ajo mund të shkatërrojë shumë gjëra. Unë mendoj se kurrë nuk jam ndjerë sikur i përkisja ndokujt. Ose gjithmonë kam ndjerë sikur nuk i përkisja trupit tim. Ndihesha kaq e humbur”, rrëfeu Cara.
