Nacionalistët serbë kanë mbushur Instagramin e Vesa Lumës me komente ofenduese e kritika në lidhje me vendosjen e Kosovës në hartën e Apple.
Ka qenë këngëtarja shqiptare ajo e cila ka treguar komentet dhe mesazhet fyese që i vinin në adresë të saj, ndërsa nuk ka ngurruar t’u japë atyre edhe një përgjigje publike.
Nga Zelanda e Re ku po jeton, Vesa ka shfaqur një foto të inbox-it të mbushur me komente raciste nga të rinj serbë.
“Çfarë zgjimi i mëngjesit. Kjo fushata e ktyne. Gjeni një jetë njerëz. Kosova s’ka qenë kurrë e as s’do jetë e juaja” – është shprehur këngëtarja e njohur sipër fotografisë.
Duke qenë se mesazhet janë të pafund, Vesa zgjedh t’ju japë edhe një leksion për gjuhën shqipe, për të cilën thotë se është më e vjetra.
Dua Lipa ka qenë ndër të parat që u sulmua, pasi publikoi flamurin autokton.
Një lumë kritikash kanë vërshuar nga serbët në profilin e Duas dhe veprimi i saj është komentuar në mbarë botën, ndërkohë që këngëtarja shpjegoi publikisht se thjesht është krenare për origjinën e saj dhe dëshiron që Kosova të zërë vendin që i takon.
