Ekspozitë
datat: 2 – 10 dhjetor 2016
Galeria FAB / Universiteti i Arteve
Adresa: Rr. Ibrahim Rrugova, nr. 22, Tiranë
Arkitektura vizive e Arben Golemit – mes grishjes dhe ekspresionizmit mbi formën
Piktura e Arben Golemit, e risjellë në këtë aventurë të re vizive në ambjetet e Galerisë FAB, e fton shikuesin në eksplorimin e asaj filozofie personale përkufizuar si “Saper Vedere L’Artittetura”.
I dyzuar që në ndërtimin e tij akademik mes arkitekturës dhe pikturës, Golemi e ripërcjell leximin e strukturës arkitektonike si piktor që në fillesat e tij si profesionist. Në fakt temat e tij fillimisht prekin strukturën tradicionale të qytetit të tij të lindjes (Beratit), për t’u rivitalizuar më pas me ato të trashëgimisë kulturore, apo ato në sipërfaqet baroke të Muzeut të Luvrit. Në cikle të tjerë ato lëshohen vertikalisht nën ritmin e ndërtesa qiellgërvishtëse të Nju Jorkut, për tu përmbyllur nga përthithja instike e pyjeve shumëdrurësh. Në këto mori temash struktura stilistike e estetike e Golemit mbetet shtylla kurrizore e gjithë krijimtarisë së tij.
Si i tillë, zbërthimi stilistik i gjithë këtyre tematikave mbetet ai i ngjyrave ekspresive, pastoze e të markuara thellë, ku linjat vertikale e horizontale herë thërrasin eko nga ekspresionizmi abstrakt e herë ato të kubizmit të ditëve të para.
Besnik i kësaj forme, artisti në këtë ekspozitë të 23-të personale propozon një mjet të ri, atë të gërvishtjes së sipërfaqes së telajos, si tentativë e rinovuar për të shtuar ekspresivitetin e ngjyrës, shenjës së tij identitare. Të shpërndara me ritëm mbi ngjyrën pastoze, këto gërvishtje të përsëritura, rrisin impaktin sensorial mbi të njëjtat subjekte, si një formë e re komunikimi me veten.
Në shtegun e hequr prej mëse tre dekadash, Golemi risjell arkitekturën e tij vizive, me këtë aventurë e re, me një gjuhë të konsoliduar në kërkim të shprehive të reja, si një mundësi për të komunikuar si gjithmonë emocionet e krijimit të parë.
Film
“Nuk ishte faji im”
6 dhjetor
Në kuadër të fushatës ndërkombëtare 16 ditore kundër dhunës në familje dhe dhunës me bazë gjinore, Strehëza për Gra dhe Vajza dhe Shoqata Kulturore Ardhmëria sjellin për publikun materialin filmik mbi dhunën në familje “NUK ISHTE FATI IM…”- Dhuna në familje na përket të gjithëve, i cili do të shfaqet për publikun në datën 6 dhjetor 2016 ora 18:00.
Një prodhim që ka në fokus çështjet e dhunës në familje dhe dhunës me bazë gjinore, e parë nga një këndvështrim kulturor, soci-ekonomik dhe institucional. Ky material filmik sjell eksperincat e rasteve të të mbijetuarave të dhunës në familje mbi sfidat dhe mundësitë e tyre, këndvështrimin e ekspertëve mbi dhunën në familje, informacion praktik për publikun mbi mënyrat dhe format e adresimit të dhunës në familje, mesazhe sensibilizuese, etj.
Regjia dhe montazhi: Nelson Mulla & Erzen Pashaj
Skenari: Mariglen Mulla & Marsela Allmuça
Teatër
E shtunë/E diel ora 10:30
Teatri Kombëtar Eksperimental për fëmijë
“Gjetja e festes se humbur’ bën fjale për dy fëmijë qe i mendojnë festat si qenie të gjalla te cilat vijnë afër nesh vetëm ne data te caktuara dhe na japin lumturi. E meqë nuk i presin dot këto data, ata hedhin idenë për te shkuar te shtëpia e babagjyshit te Krishtlindjes pasi mendojnë se aty jetojnë festat, dhe bëjnë plan ti marrin ato e ti sjellin ne shtëpinë e tyre, por nuk dine rrugën për atje. Dhe ndërkohe për çudi kapela qe ata kane ne dhome fillon flet dhe u prin rrugën për te gjetur festat. Ata dalin nga shtëpia dhe ecin ne pyll, aty ndeshen me situata te rrezikshme dhe argëtuese, ku secila nga ato u shërben për një mësim te mire, deri sa arrijnë te shtëpia e babagjyshit, aty nuk gjejnë festa, por gjejnë vendin e sigurt se ku janë festat.
