1 shtator
Ekspozitë
“Wonders of a pencil”
Ramazan Memishi
Ka lindur në Oreshke të Kukësit, ne 04/04/1957. Ka kryer shkollën fillore në Oreshkë dhe tetëvjeçaren në Krume te Hasit, ku njeh dhe pasionin për pikturën. Në 1977 kryen shkollën e mesme artistike ” Jordan Misja ” dhe në 1981 mbaron studimet në Akademinë e Arteve në Tiranë për Skenografi me professor Agim Zajmi. Prindërit e tij Hakik Memishi dhe Arze Memishi kanë jetuar në fshat. Ata i krijuan mundësi për shkollim duke i ushqyer pasionin për artin. Ai u rrit dhe u edukua në ambient ku fliteshin dy gjuhë: Maqedonisht dhe Shqip, gjë që ndikoi në formimin e tij kulturor. Pasion të dytë ka Letersinë. Ai është i martuar me Shpresën (mjeshtre e realizimit të sixhadeve) dhe ka tre vajza: Jelinën, Anitën dhe Loretën.
Ai ka hapur ekspozita personale dhe ka qenë pjesë e ekspozitave kolektive në shtete të ndryshme. Punon në teknika të ndryshme : vizatim, grafikë, pikturë, skenografi, skulpturë, tapiceri dhe piktura murale. Ka kryer udhëtime studimi në Gjermani, Belgjikë, Francë, Angli, Skoci, Kosovë, Maqedoni etj..
Ka vepra në fondin e Galerisë Kombetare të Arteve, Tiranë dhe koleksione private në Shqipëri, Francë, Gjermani, Skoci etj. Për krijimtarinë e tij ka shkrime dhe dokumentare nga kritikë dhe piktorë të njohur si Naxhi Bakalli, Nazmi Hoxha, Lulzim Mema, Luljeta Lleshanaku, Suzana Varvarica Kuka, Kujtim Halili, Vasil Ikonomi, LLambi Blido, Agim Spahiu dhe Nazif Dokle etj.
Ekspozitë
“QAMIL GREZDA, GRABITQARI I BUKURISË SË NATYRËS… 1917-1992″
EKSPOZITË
31 Gusht – 10 Shtator 2017
Galeria Kombëtare e Arteve, ka kënaqësinë të çel për publikun më 31 Gusht 2017, ora 19.00, ekspozitën “Qamil Grezda, grabitqari i bukurisë së natyrës… 1917-1992”.
Ekspozita e cila hapet në sallën e përkohëshme të ekspozitave është një dedikim me rastin e 100 vjetorit të lindjes së artistit dhe përmbyll kalendarin e aktiviteteve në këtë kuadër.
E kuruar nga Oltsen Gripshi, ekspozita “Qamil Grezda, grabitqari i bukurisë së natyrës… 1917-1992” , do të prezantojë një koleksion të pasur prej 55 veprash. Midis tyre janë tablo në teknikën e vajit, 9 nga të cilat pjesë e fondit të GKA, vepra në teknikën e pastelit dhe vizatime në letër, të cilat zënë një pjesë të rëndësishme në ekspozitë. Përmes retrospektivës, por edhe veprave të paekspozuara më parë, vizitorët do të mund të njohin disa aspekte të jetës dhe rrugëtimit artistik të Qamil Grezdës.
Krahas artit të Grezdës, në sallë do të shfaqen edhe objekte origjinale të vetë artistit si: xhaketa, apo kapelet të cilat mbante kur pikturonte në natyrë, kavaleti, dy tavalocat, valixhja me penelat e bojrat, fotografi të piktorit gjatë periudhës së studimeve, diploma e Akademisë së Arteve të Bukura në Romë, letërkëmbimet mes tij dhe artistit të madh Ibrahim Kodra, video e vizitës së Ibrahim Kodrës në shtëpinë e Qamil Grezdës pas vdekjes së këtij të fundit, blloku i vizatimeve dhe skicave, qysteku në ar të cilin e mbante me vete kudo ku shkonte, ditari vetjak dhe maska në allçi e piktorit fill pas vdekjes së tij.
Krijmatria artistike e piktorit Qamil Grezda karakterizohet në tërësinë e saj në leximin horizontal pikërisht nga ndikimet historike të pikturës së peizazhit italian të fund shekullit të XIX-të. Ndikime të cilat artisti i huazoi falë studimeve që kreu në akademitë e arteve të bukura në Firence dhe “San Luca” të Romës, në gjysmën e parë të shekullit të XX-të. Për piktorin Grezda ndikimi nga piktura italiane dhe mjeshtrat e saj ishte i pashmangshëm dhe kjo ndjehet si në modelimin akademik të gjinisë së portretit, figurës, si dhe makiaioliste të peizazhit në veçanti, që më pas do të shkruante emrin e tij me gërma të arta në plejadën e artistëve shqiptar. Një frymë, e cila në rrafshin historik gjen shumë elementë të përbashkët me pikturën e peizazhit napoletan të viteve 1800 të shekullit XIX-të. Kur përmend këtë periudhë të pikturës napoletane dhe në tërësi të asaj italiane, kam në mendje Scuola di Posillipo (Shkolla e Pozilipos). Në të vërtetë stili piktorik i Qamil Grezdës gërsheton tri mendësi, tri fryma artistike stilistikore atë të Macchiaioli[it] (Makiaiolëve), Scuola di Posillipo (Shkollës së Pozilipos) dhe Divisionismo për t’u prezantuar më pas me publikun përmes një personaliteti të tij krejt origjinal .
Konferenca për shtyp mbi ekspozitën do të zhvillohet ditën e enjte, më 31 gusht, ora 11.00.
Ekspozita do të qëndrojë e hapur deri më 10 shtator 2017.
