Një event kushtuar modës dhe njerëzve që e ndjekin dhe e bëjnë atë është gjithmonë për mos t’u humbur. E kthyer tashmë në një traditë, sezoni i nëntë i “Prishtina Fashion Nights” solli edhe këtë herë diçka ndryshe.
Krijimet e 22 dizjanuesve u paraqitën gjatë dy netëve të eventit, 28 dhe 29 tetor, përmes 30 modeleve. Një skenë e madhe që ishte përgatitur enkas për evenimentin e modës, ku u prezantuan koleksionet vjeshtë-dimër 2016.
Modelet e “ICON Agency” u bënë sërish pjesë e këtij eventi duke sfiluar në të dy netët e tij. Ndërsa në natën e parë vëmendja iu kushtua veshjeve të nuseve dhe më solemne, nata e dytë paraqiti koleksione për veshjet e përditshme. Modelet e “ICON Agency”, Anxhela Haka dhe Doriana Ahmataj sfiluan në të dy netët e eventit të modës, duke sjellë elegancën dhe profesionalizmin e tyre.
I gjithë organizimi u përcoll me duartrokitje, ndërsa e veçanta e tij ishin dy sfilatat me veshje për fëmijë, ku të vegjlit u përfshinë për herë të parë në këtë organizim. Blodin Karaxha, një nga organizatorët e eventit, tregon për mediat se, sfilatat me fëmijë i dhanë një madhështi mbrëmjes së parë.
Në këtë event ishin të pranishëm rreth 500 të ftuar, të cilët ishin kuriozë të shikonin nga afër punën e dizajnuesve dhe markave nga Kosova, Shqipëria, Ulqini dhe Turqia, që shpalosën koleksionet dhe stilin e tyre. Personazhet e njohur nuk munguan gjatë dy netëve kushtuar modës.
Burimi: Iconstyle
